Professor Kənan Yusif-zadənin “Tibbi Terminlərin İzahlı Lüğəti” kitabının təqdimatı keçirilib

Professor Kənan Yusif-zadənin “Tibbi Terminlərin İzahlı Lüğəti” kitabının təqdimatı keçirilib
Oxunma sayı: 1640

Noyabrın 29-da Bakı Kitab Mərkəzində tibb elmləri doktoru, professor, əməkdar həkim Kənan Yusif-zadənin Azərbaycanda ilk dəfə geniş həcmli, 30 minə yaxın söz və söz birləşməsini özündə ehtiva edən “Tibbi Terminlərin İzahlı Lüğəti” kitabının təqdimatı keçirilib. Tədbirdə səhiyyə ictimaiyyətinin görkəmli şəxsləri, millət vəkilləri, tibb sahəsi üzrə mütəxəssislər və media nümayəndələri  iştirak edib.

Tədbir zamanı professor Kənan Yusif-zadənin tibb təhsili və “Tibbi Terminlərin İzahlı Lüğəti” kitabının ərsəyə gəlməsinə dair qısa video çarx qonaqlara təqdim olunub.

Lüğətin redaktoru, professor Əhliman Əmiraslanov çıxışı zamanı lügətlərin tibb sahəsi üçün əhəmiyyətini vurğulayaraq daim yenilənməli və yeni lüğətlərin nəşr olunmasını bildirib. Səhiyyə nazirinin müavini Nadir Zeynalov milli səhiyyənin rəqəmsallaşmasının vacibliyini qeyd edərək müəllifi təbrik edib. Azərbaycan Respublikası Nazirlər Kabineti Yanında Terminologiya Komissiyasının Sədr müavini professor Sayalı Sadıqova Terminologiya Komissiyasında son dövrlərdə 165 terminoloji lüğət nəşr olunmasını qeyd edərək elm sahəsinin inkişafı üçün lüğətlərin tərtib olunmasının vacibliyini vurğulayıb. Azərbaycan Mühəndislik Akademiyasının vitse-prezidenti Əhəd Canəhmədov 30 minə yaxın söz və söz birləşməsini özündə ehtiva edən “Tibbi Terminlərin İzahlı Lüğəti”ni Azərbaycan tibb elminin inkişafı üçün kitabın əhəmiyyətini yüksək qiymətləndirib. Referans Medical Groupun direktoru Hansiyar Babayev çıxışı zamanı Kənan Yusif-zadəni təbrik edərək fəaliyyətində uğurlar arzulayıb. Daha sonra qonaqlara Referans Klinik Laboratoriya Mərkəzinin 6 illik fəaliyyətini əks etdirən qısa video çarx təqdim olunub.

Sonda müəllif Kənan Yusif-zadə lüğətin hazırlanmasında və nəşrində zəhmət çəkən, eyni zamanda, təqdimatda iştirak edən hər kəsə dərin minnətdarlığını bildirərək təşəkkür edib.