“Qafqazinfo” xəbər verir ki, bunu Aktual.az-a millət vəkili Siyavuş Novruzov deyib. 

YAP-çı deputat, müasir yazarlara marağı haqqında suala cavab olaraq, deyib ki, onların yazılarını mütəmadi oxuyur: 

"Deyim ki, maraqlı yazılar çoxdur. Həm psixoloji, həm mövcud reallığı əks etdirmək baxımından yaxşı yazılar olur. Mən daha çox “525-ci qəzet”də və Ədəbiyyat jurnallarında gənc yazarlarımızın yazılarını oxuyuram. Hamısına diqqət yetirirəm". 

Siyavuş Novruzov, həmçinin, yazılarında daha çox vulqar (söyüş) sözlərdən istifadə edən müasir yazarlar barədə ona ünvanlanmış sualı belə cavablandırıb:

"Ədəbiyyatın geniş xətti var. Mən özüm daim mütailə edən insanam. Bədii əsərləri mütaliə etməyi çox sevirəm - istər dünya ədəbiyyatı olsun, istərsə də Azərbaycan. Tam yazıları da oxuyuram. Hərə bir cür görür bunu. Məsələn, Seyid Əzim Şirvani, Sabir, Cəlil Məmmədquluzadə. Biri şeirdə və ya hekayədə mövzuya satirik yanaşırdırsa, digəri özünü klassik ədəbiyyatın davamçısı kimi aparırdı. Yəni ədəbiyyatda hərə düşündüyü kimi yeni janr ortaya qoymaq istəyir. Məsələn, şairlərimizdən Məhəmməd Füzuli elə bir üslübda yazdı ki, 3 yüz il ona çatan olmadı. Onu demək istəyirəm ki, hər bir yazar çalışır, elə bir yol tapsın ki, bu, onun adı ilə bağlansın. Ona görə də, klassik ədəbiyyatdan uzaqlaşıb modernləşmə və yaxud da yeni üslüb xətti ilə bu məsələlərə yanaşırlar".