Bu gün Topaz Premyer Liqasında XVI tura yekun vurulub.
“Qafqazinfo” xəbər verir ki, "Qarabağ" səfərdə "Zirə" ilə 0:0 bərabərə qalıb.
Zirə qəsəbə stadionundakı matçdan sonra təşkil olunan mətbuat konfransında açıqlama verən ev sahibi komandanın baş məşqçisi Adil Şükürov heç-heçəni belə şərh edib: “Ağır oyun oldu. Rəqib haqda əlavə söz deməyə ehtiyac yoxdu. 1 xal qazandıq” .
- Oyundan öncə 1 xala razı idiniz?
- Biz bu oyuna 3 xal üçün çıxmışdıq. Ancaq oyuna nəzər saldıqda 1 xal yaxşı nəticədi. Bu oyunda qalib gəlsəydik, 2-ci pilləyə qalxmaq şansımız var idi. Buna görə də meydana qələbə üçün çıxmışdıq.
- İlk oyunda "Qarabağ"a 1:4 hesabıyla məğlub olmuşduz. Bu oyunda isə heç-heçə etdiniz ilk oyunla müqayisədə "Qarabağ" daha zəif oynadı, yoxsa "Zirə" əvvəlkinə nisbətən artırıb?
- İlk oyunda məğlub olmağımıza səbəb, açıq futbol oynamağımız idi. Məhz bunun nəticəsində böyük hesabla məğlub olmuşduq. Ancaq bu gün daha qapalı oyun sərgilədik. Nəticədə, 1 xal qazandıq.