Kənd Təsərrüfatı Nazirliyi tabeliyində Aqrar Tədqiqatlar Mərkəzi (ATM) tərəfindən yeni yaradılan daha bir aqroparka qeydiyyat şəhadətnaməsi təqdim olunub.

“Qafqazinfo” xəbər verir ki, İsmayıllı rayonunun İvanovka kəndində yerləşən “İvanovka Aqropark”a rezidentin qeydiyyat şəhadətnaməsinin təqdimetmə mərasimində çıxış edən Aqrar Tədqiqatlar Mərkəzinin direktoru Rəşad Hüseynov son dövrlərdə aqroparklarla bağlı görülən işlər barədə məlumat verib.

ATM direktoru qeyd edib ki, ölkə başçısı İlham Əliyevin “Aqroparkların fəaliyyətinin təşkili, idarə olunması və inkişafı sahəsində əlavə tədbirlər və bununla əlaqədar Azərbaycan Prezidentinin bəzi fərmanlarında və Sərəncamında dəyişiklik edilməsi haqqında” 14 aprel 2025-ci il tarixli Fərmanı ilə bu sahədə mühüm dəyişikliklər edilib: “Belə ki, aqroparklara münasibətdə Kənd Təsərrüfatı Nazirliyi “səlahiyyətli orqan”, Kənd Təsərrüfatı Nazirliyinin tabeliyində Aqrar Tədqiqatlar Mərkəzi publik hüquqi şəxsi isə “idarəedici təşkilat” kimi müəyyənləşdirilib. Bundan sonra aqroparklarla bağlı bir sıra normativ hüquqi sənədlər hazırlanaraq təsdiqlənib. Hazırda isə aqroparkların potensialı üzrə diaqnostikalar yekunlaşmaq üzrədir”.

“İvanovka Aqropark” haqqında məlumat verən ATM rəhbəri bildirib ki, bu aqropark özəl aqroparkdır və innovativ texnologiyalar əsasında əkinçilik və bağçılıq üzrə ixtisaslaşması nəzərdə tutulur.

Tədbirdə çıxış edən “İvanovka Aqropark”ın direktoru Ramin Əlifov aqroparkın yaradılmasında göstərilən dövlət dəstəyinə və şəraitə görə ölkə başçısına, aidiyyəti qurumlara minnətdarlığını bildirib. O qeyd edib ki, əsasən əkinçilik və bağçılıq üzrə ixtisaslaşacaq təsərrüfat kompleksinin ümumi ərazisi 7600 hektar, layihə dəyəri 25.1 milyon manat təşkil edir: “Aqroparkda 4 tarla sxemi ilə il ərzində 500 ha ərzaqlıq buğda, 250 ha dən üçün qarğıdalı, 250 ha günəbaxan, 250 ha isə təkrar əkin olaraq silosluq qarğıdalının becərilməsi planlaşdırılır. Eyni zamanda, 1750 ha dəmyə sahədə arpa, 1500 ha sahədə buğda və 100 ha sahədə yonca bitkisinin becərilməsi, 100 ha sahədə damlama suvarma sistemi altında süfrə və texniki üzüm sortlarının becərilməsi nəzərdə tutulur”.

Tədbirin sonunda ATM direktoru Rəşad Hüseynov rezidentin qeydiyyat şəhadətnaməsini “İvanovka Aqropark”ın direktoru Ramin Əlifova təqdim edib.

Qeyd edək ki, hazırda ölkədə aqropark statusu olan təsərrüfatlar fəaliyyət istiqamətlərinə görə bitkiçilik, heyvandarlıq, emal, çeşidləmə-qablaşdırma və logistika üzrə ixtisaslaşıb. Bu təsərrüfatlarda istehsal olunan əsas məhsullara isə taxıl məhsulları, ət və ət məhsulları, süd və süd məhsulları, bitki yağları və heyvan yemləri kimi geniş çeşiddə məhsullar daxildir. Aqroparklarda əldə olunan məhsullar həm yerli bazarlarda, həm də xarici bazarlarda realizə edilir.

Bu günədək ölkə üzrə aqroparklarda 10 minə yaxın daimi və mövsümi iş yerləri yaradılıb.