Yeni araşdırma Avropada səyahətçilər üçün ən sərfəli və ən bahalı şəhərləri müəyyən edib. Artan aviabilet qiymətləri fonunda turistlərin bahalı səfərlər əvəzinə daha qənaətcil və rahat marşrutlara üstünlük verdiyi bildirilir. Bu yay qısa şəhər tətilləri Avropanın əsas səyahət trendlərindən biri olacaq.

“Qafqazinfo” xəbər verir ki, “Post Office Travel Money” tərəfindən hazırlanan “Şəhər Xərcləri Barometri” hesabatında 50 şəhərdə turistlərin əsas xərcləri müqayisə olunub.

Araşdırma çərçivəsində iki nəfər üçün 12 əsas turist xərci nəzərə alınıb. Bunlara bir fincan qəhvə, bir şüşə pivə, qazlı içki, bir stəkan şərab, iki nəfərlik üç çeşidli şam yeməyi və digər gündəlik xərclər daxil edilib.

Hesabatda həmçinin nəqliyyat xərcləri - hava limanı transferi və 48 saatlıq ictimai nəqliyyat biletləri, şəhər turu avtobusları, muzey və qalereyalara giriş haqları da hesablanıb. Bundan əlavə, iki nəfərlik üçulduzlu hoteldə iki gecəlik qalma qiymətləri ümumi büdcəyə əlavə olunub.

Araşdırmada vurğulanır ki, şəhərin ümumi reytinqindən daha vacib məqam turistlərin səfər zamanı gündəlik xərcləri necə hiss etməsidir. Xüsusilə hotel qiymətlərindəki kiçik artımların belə qısa tətilin ümumi büdcəsinə ciddi təsir göstərə biləcəyi qeyd edilir.

Bildirilir ki, daha əlverişli şəhərlərdə turistlər planlarını daha rahat və spontan şəkildə qura bilir. Bahalı istiqamətlərdə isə xərclərə nəzarət etmək üçün əvvəlcədən planlaşdırma daha vacib esab olunur.

2026-cı ildə Avropada tətil üçün ən ucuz şəhərlər hansılardır?

Hesabata görə, bəzi Avropa şəhərləri “gəlmə anından etibarən xeyli əlverişli” hissi yaradır. Bu şəhərlərdə çöldə yemək daha qənaətcil, ictimai nəqliyyat daha əlçatandır və bir çox turistik məkanı gözləniləndən daha aşağı qiymətə ziyarət etmək mümkündür. Bu, səyahətçilərə daim büdcə tərtib etmədən və ya xərclərini izləmədən şəhər təcrübəsinə daha asanlıqla qərq olmağa imkan verir.

Barometr nəticələri göstərir ki, Şərqi Avropa şəhərləri hələ də tətillər üçün əlverişli olması ilə seçilir. Ən əlverişli 10 məkandan səkkizi Şərqi Avropa şəhərlərindəndir.

Barometrdəki 12 xərc kateqoriyasına əsasən, 248 funt-sterlinqlə (568 manat) Sarayevo ilk dəfə olaraq 2026-cı il üçün Avropada ən yaxşı qiymətə tətil mümkün olan şəhərdir. Bosniya və Herseqovinanın paytaxtı Buxarest, Tirana, Belqrad və Trençinlə birlikdə ilk beşlikdədir.

Əlverişli yaşayış yeri, ucuz ictimai nəqliyyat və münasib giriş haqları olan turistik yerləri ilə Sarayevo “yüksək qiymətlər olmadan güclü mədəniyyət, tarix və qastronomiya axtaran” səyahətçilər üçün “mükəmməl” seçim kimi təsvir edilir.

Görüləsi çoxlu yerlər və əlverişli yemək seçimləri axtaranlar üçün Rumıniyanın paytaxtı Buxarest “sifariş ediləcək şəhər” kimi seçilir. Aşağı yaşayış, yemək və nəqliyyat xərcləri şəhəri “bu ilin tətil üçün ən ucuz şəhərləri” arasında möhkəm bir yerə çevirir.

“Yeni populyar” Tiranada rahat tətil üçün “lazım olan hər şey” var. Hesabata görə, Serbiyanın paytaxtı Belqrad gecə həyatı, yemək və çay kənarında gəzintiləri ilə “böyük şəhər qiymətləri olmadan bütün gözləntiləri” təklif edir.

İlk beşliyi tamamlayan Slovakiyadakı Trençin əsas paytaxtlara “daha sakit alternativ” təklif edir və çox aşağı gündəlik qiymətlərlə “bol gəzinti, tarixi yerlər və daha yavaş temp” axtaran ziyarətçilər üçün idealdır.

Avropada tətil üçün ən sərfəli 10 şəhər

Sarayevo — 248 funt-sterlinq / 568 manat

Buxarest — 258 funt-sterlinq / 591 manat

Tirana — 263 funt-sterlinq / 603 manat

Belqrad — 265 funt-sterlinq / 607 manat

Trençin — 272 funt-sterlinq / 624 manat

Riqa — 278 funt-sterlinq / 637 manat

Lil — 289 funt-sterlinq / 662 manat

Vilnüs — 289 funt-sterlinq / 662 manat

Strasburq — 319 funt-sterlinq / 731 manat

Podqoritsa — 332 funt-sterlinq / 761 manat

2026-cı ildə Avropada tətil üçün ən bahalı şəhərlər hansılardır?

Oslo 2026-cı il üzrə Avropada tətil üçün ən bahalı şəhər kimi qiymətləndirilib. Hesabata görə, şəhərdə 12 əsas turist xərci üzrə ümumi məbləğ təxminən 734 funt-sterlinq (1683 manat) təşkil edir.

Oslo ilə yanaşı, ən bahalı şəhərlər siyahısında Kopenhagen, Edinburq, Cenevrə və Barselona da yer alıb.

Hesabatında qeyd olunur ki, yüksək yaşayış xərcləri və xüsusilə restoranlarda yemək qiymətləri ümumi səyahət büdcəsini ciddi şəkildə artırır.

Bildirilir ki, bir çox Avropa şəhərində gündəlik xərclərin yüksəlməsi qısa tətillərin ümumi dəyərinə birbaşa təsir göstərir və turistlərin planlaşdırma strategiyalarını dəyişməsinə səbəb olur.

2026-cı ildə tətil üçün Avropanın ən bahalı 10 şəhəri

Oslo — 734 funt-sterlinq / 1683 manat

Kopenhagen — 671 funt-sterlinq / 1538 manat

Edinburq — 668 funt-sterlinq / 1531 manat

Cenevrə — 644 funt-sterlinq / 1476 manat

Barselona — 641 funt-sterlinq / 1469 manat

Dublin — 611 funt-sterlinq / 1400 manat

Amsterdam — 609 funt-sterlinq / 1396 manat

Kork — 602 funt-sterlinq / 1380 manat

Venesiya — 580 funt-sterlinq / 1330 manat,

Madrid — 580 funt-sterlinq / 330 manat