ABŞ-ın investisiya bankı "Bank of America Merrill Lynch" xam neft qiymətlərinin gələn il 100 dollara qalxa biləcəyini açıqlayıb.

“Qafqazinfo” Marjaya istinadən xəbər verir ki, Bankın hesabatında, gələn il qlobal neft bazarında tələb və təklif balansında kəsir olacağı bildirilib.
 
Hesabatda, dünya üzrə ən geniş istifadə edilən Brent növü xam neftin orta hesabla barrel qiymətinin bu il 70 dollar, gələn il isə 75 dollar olacağı proqnozu yer alıb.
 
Hesabatda fikirlərinə yer verilən "Bank of America Merrill Lynch"ın Əmtəə Araşdırmaları Departamentinin direktoru Francisko Blanch, "2019-un ikinci yarısı üçün Brentdə 90 dollar qiymət hədəfi qoyuruq və xam neft qiymətlərinin gələn il 100 dollara çatması riski olduğunu görürük" - ifadələrini istifadə edib.
 
Gələcək 18 ayda qlobal neft tələb- təklif balansında kəsir (təklif tələbi tam ödəməyəcək) gözləndiyinə diqqət çəkilən hesabatda, Venesuelada düşən neft hasilatına və İranın xam neft ixracının azalması ehtimalına işarə edilib.
 
Hesabatda, ABŞ ilə İran arasında 6 ay ərzində yeni bir müqavilə bağlanmaması və ya Neft İxrac Edən Ölkələr Təşkilatı (OPEC) və Rusiya daxil tərəfdaşlarının hasilatın azaldılması müqaviləsinin gələn il də davam etməsi hallarında, qlobal neft bazarında kəsirin yaranmasının mümkün olduğu barədə xəbərdarlıq edilib.
 
ABŞ Prezidenti Donald Trampın ölkəsinin İran ilə nüvə müqaviləsindən çıxdığını açıqlamasından sonra neft qiymətləri yüksəlib.
 
Bu gün, Brent neftin barrel qiyməti 77,97 dollara, Qərbi Texas (WTI) neftinin barrel qiyməti də 71,88 dollara qədər yüksəlib.