Azərbaycan və Ermənistan XİN rəhbərləri görüşdü - Yenilənib
Moskvada Azərbaycan və Ermənistanın XİN rəhbərləri Ceyhun Bayramovla Ararat Mirzoyan arasında ikitərəfli görüş keçirilir.
“Qafqazinfo” “Sputnik Ermənistan”a istinadən xəbər verir ki, bu barədə məlumatı Rusiyanın XİN rəhbəri Sergey Lavrov həmkarları ilə üçtərəfli görüşün yekunlarına dair danışarkən açıqlayıb.
Onun sözlərinə görə, ümumilikdə Rusiyanın vəzifəsi ikitərəfli görüşün keçirilməsi üçün platformanın təqdim edilməsindən ibarətdir.
***
Azərbaycan Xarici İşlər Nazirliyi sözügedən görüşlə bağlı məlumat yayıb.
XİN-dən “Qafqazinfo”ya verilən məlumata görə, nazir Ceyhun Bayramov və Ararat Mirzoyan Azərbaycan, Ermənistan və Rusiya liderlərinin üçtərəfli bəyanatlarının icrası ilə bağlı mövqelərini təqdim ediblər.
Tərəflər “Sülh və dövlətlərarası münasibətlərin qurulması haqqında” saziş layihəsi üzərində işi davam etdiriblər. Tərəflər arasında hələ də fikir ayrılıqlarının mövcud olduğu mövzular ətrafında konstruktiv fikir mübadiləsi aparılıb.
Nazirlər Azərbaycan və Ermənistan arasında danışıqların təşkilinə görə Rusiya tərəfinə minnətdarlıqlarını bildiriblər. Tərəflər müzakirələri davam etdirmək barədə razılığa gəliblər.
Nazirlər həmçinin Rusiyanın xarici işlər naziri Sergey Lavrovla da ayrıca görüşlər keçiriblər.
Son Xəbərlər
- 1
- 2
- 3
- 4
- 5
- 6
