“Bu gün hisslərimi anlatmaqda çətinlik çəkirəm. Çünki həm sevinc, həm kədər, həm qürur hissi yaşayıram”.

“Qafqazinfo” xəbər verir ki, bu sözləri Oxu.az-a açıqlamasında Birinci Qarabağ müharibəsində itkin düşdüyü hesab edilən və şəxsiyyəti müəyyənləşdirilən şəhid Mübariz Şahmurovun həyat yoldaşı Dilşad Şahmurova deyib.

Dilşad Şahmurova qeyd edib ki, 33 illik həsrət bu gün sona çatıb: “Bu işdə kimin əziyyəti, zəhməti varsa, öz təşəkkürümü bildirirəm. Dövlətimiz tərəfindən itkin şəhidlərimizin tapılması üçün böyük addımlar atılıb. O, Xocalı istiqamətində gedən döyüşlərdə şəhid olub. Xocalı soyqırımında altı döyüşçü o boyda ordunun qabağına çıxdı, dik öndə durdular, heç nədən qorxmadılar”.

Onun sözlərinə görə, hadisə baş verməzdən iki gün öncə Mübariz öz dostuna zəng edib: “Deyib, evə çatdır ki, mənim sağ qayıtmağımı gözləməsinlər, həyat yoldaşımı, uşaqlarımı Allaha əmanət edirəm. Öləcəyini bilə-bilə getdi. Ona görə də şəhidimlə qürur duyuram”.

Dilşad Şahmurova həyat yoldaşı Mübariz barədə təəssüratlarını da bölüşüb: “O çox gözəl insan, ailə başçısı olub. Gözəl ata, həyat yoldaşı idi. Ən əsası çox vətənpərvər vətəndaş idi. Onu ilk dəfə 20 Yanvar hadisələrində tanıdım ki, bu insan necə vətənpərvərdir”.

Qeyd edək ki, Birinci Qarabağ müharibəsi şəhidi M. Şahmurov 1963-cü il iyunun 12-də Sabirabad rayonunun Navdan kəndində anadan olub. O, 1992-ci il fevralın 26-da Xocalı rayonu istiqamətində gedən döyüşlərdə itkin düşüb. Bu gün Birinci Qarabağ müharibəsində itkin düşmüş hesab edilən M.Şahmurovun şəxsiyyəti müəyyənləşdirilərək Bakının Nizami rayonunun Keşlə qəsəbəsində yerləşən Şəhidlər xiyabanında dəfn edilib.