Bakı Slavyan Universitetinin Əlavə və qiyabi təhsil şöbəsinin sabiq müdiri Dürdanə Əliyevanın cinayət işi üzrə məhkəmə araşdırması başa çatıb.

“Qafqazinfo”nun məlumatına görə, Bakı Ağır Cinayətlər Məhkəməsində keçirilən sonuncu iclasda hökm oxunub.

Prosesdən əvvəl sədrlik edən hakim Əli Məmmədov jurnalistləri zaldan çıxarıb, hökm qapalı elan olunub.

Hökmə əsasən, D.Əliyeva ittiham olunduğu maddələrlə təqsirli bilinərək 6 il müddətə azadlıqdan məhrum edilib. Xanım müttəhim məhkəmə zalında həbs edilib.

İş üzrə zərərçəkmiş qismində tanınmış Bakı Slavyan Universitetinin D.Əliyevaya qarşı qaldırdığı 226 min manat məbləğində mülki iddia təmin edilib. Digər zərərçəkmiş şəxslərin mülki iddiası isə əsaslı hesab olunmayıb.

D.Əliyevanın hökmdən sonra halı pisləşib, təcili tibbi yardımın müşayiəti ilə zaldan çıxarılıb.

Xatırladaq ki, D.Əliyeva Baş Prokuror yanında Korrupsiyaya qarşı Mübarizə Baş İdarəsi tərəfindən cinayət məsuliyyətinə cəlb edilib.

Ona qarşı Cinayət Məcəlləsinin 179.3.2 (külli miqdarda mənimsəmə), 178.3.2 (dələduzluq külli miqdarda ziyan vurmaqla törədildikdə), 311.1 (rüşvət alma) və 32.4, 312.2 (rüşvət verməyə təhrik etmə) maddələri ilə ittiham irəli sürülüb, barəsində istintaq dövrü müddətində həbsə alternativ qətimkan tədbiri seçilib.

İttihama görə, o, BSU-nun Əlavə və qiyabi təhsil şöbəsinin müdiri olduğu 2018-2021-ci illərdə mənimsəmə və rüşvət alma yolu ilə 226 min manat ələ keçirib.

D.Əliyeva özünü təqsirli bilməyib, tələbələrdən alınan pulu universitetin o vaxtkı rektoru Nurlana Əliyevaya verdiyini deyib. N.Əliyeva isə məhkəmədə bütün qanunsuzluqlarda Dürdanə Əliyevanı ittiham edib.

Sail Ağasəlim