Paytaxtın uşaq evlərində “Bizim Ulu Öndərimiz” adlı tədbirlər keçirildi - Fotolar

paytaxtin-usaq-evlerinde-bizim-ulu-onderimiz-adli-tedbirler-kecirildi
Oxunma sayı: 817

“Heydər Əliyev ili” çərçivəsində Bakıdakı 1 və 2 nömrəli Uşaq evlərində Azərbaycan xalqının Ümummilli Lideri, müstəqil Azərbaycan dövlətinin qurucusu, görkəmli siyasi və dövlət xadimi Heydər Əliyevin anadan olmasının 100 iliyinə həsr edilmiş “Bizim Ulu Öndərimiz” adlı tədbirlər keçirilib.

“Qafqazinfo” xəbər verir ki, uşaq evlərindəki tədbirlərin əvvəlində iştirakçıların ifasında Azərbaycan Respublikasının Dövlət Himni səsləndirilib. Sonra Ümummilli Lider Heydər Əliyevin həyat və fəaliyyətinə həsr edilən videoçarx nümayiş etdirilib.

Çıxış edənlər Ulu Öndər Heydər Əliyevin həyat və fəaliyyətindən, onun iştirakı ilə uşaq evlərindəki tədbirlərdən danışıblar. Qeyd edilib ki, Azərbaycanda uşaqlar dövlət tərəfindən hərtərəfli diqqət və qayğı ilə əhatə olunublar. Ölkəmizdə uşaq siyasətinin əsası məhz Ümummilli lider Heydər Əliyev tərəfindən qoyulub və Azərbaycan uşaqları hər il Heydər Əliyevlə olan görüşlərindən sonsuz coşqu və böyük ilham alırdılar. Bu səmimi görüşlər hər bir uşağın yaddaşında əbədi iz qoyub.

Bakı Şəhər İcra Hakimiyyətinin şöbə müdiri Elmin İmanov Ümummilli Lider Heydər Əliyevin ölkəmizin inkişafı və tərəqqisinə yönələn fəaliyyətindən danışıb və ölkə başçısı, Ali Baş Komandan İlham Əliyev və Birinci vitse-prezident Mehriban Əliyevanın bu gün həyata keçirdiyi işlər barədə ətraflı məlumat verib.

Tədbirlərdə uşaq evlərinin şagirdlərinin ifasında Ulu Öndər Heydər Əliyevə, Prezident İlham Əliyevə, Azərbaycana həsr olunan şerlər və mahnılar səsləndirilib, uşaqlar şən rəqs nümunələri ilə çıxış ediblər.