Ermənistan və ABŞ Ermənistan ərazisində həyata keçiriləcək TRIPP multimodal tranzit marşrutunun inkişafı üzrə əməkdaşlıq planını açıqlayıb.

“Qafqazinfo” xəbər verir ki, layihə yalnız əvvəlcədən müəyyən ediləcək tranzit marşrutları daxilində icra olunacaq və bütün layihə sahələri Ermənistanın tam suverenliyi altında qalacaq.

TRIPP infrastrukturunun hazırlanması və icrası üçün TRIPP İnkişaf Şirkətinin yaradılması planlaşdırılır. Şirkət layihənin inkişafına cavabdeh olacaq və ilkin mərhələdə 49 il müddətinə inkişaf hüququ alacaq.

Razılaşmaya əsasən, ABŞ şirkətdə 74%, Ermənistan isə 26% paya sahib olacaq. Daha sonra müqavilənin əlavə 50 il uzadılması və Ermənistan hökumətinə əlavə kapital verilməsi ilə payının 49%-ə çatdırılması nəzərdə tutulur. Şirkətin səhmdar və faydalı sahiblərinin dəyişdirilməsi yalnız ABŞ və Ermənistan hökumətlərinin əvvəlcədən razılığı ilə mümkün olacaq.

Layihənin korporativ strukturu ABŞ və Ermənistan hökumətlərinin əsas qərarlarda iştirakı və ABŞ tərəfi üçün iqtisadi faydaların təmin edilməsini əks etdirəcək.

Şirkət TRIPP çərçivəsində dəmir yolu və avtomobil yolu layihələrini birbaşa icra edəcək, digər komponentlər üçün isə törəmə müəssisələr və ya xüsusi təyinatlı qurumlar yaradılacaq.

Ermənistanın şirkətdəki payı tranzit marşrutları üzrə torpaq hüquqları, mövcud infrastruktur aktivləri, tənzimləmə dəstəyi, sərhəd və gömrük infrastrukturu ilə bağlı töhfələr, eləcə də, lazımi hallarda nağd investisiyaları əhatə edir.

Hər iki ölkə layihənin icrasını əlaqələndirmək üçün bir yüksək vəzifəli dövlət məmurunu əsas koordinator kimi təyin etməlidir. O, TRIPP İnkişaf Şirkəti ilə əsas əlaqədar şəxs kimi fəaliyyət göstərəcək.