Bayramda insanların bir-birinin evinə getməsinə baxmayaraq, yoluxma artmayıb

bayramda-insanlarin-bir-birinin-evine-getmesine-baxmayaraq-yoluxma-artmayib
Oxunma sayı: 1939

“Hazırda koronavirus infeksiyası ilə əlaqədar epidemioloji durum qənaətbaxş hesab edilir”.

Bunu “Qafqazinfo”nun sorğusuna cavab olaraq, Səhiyyə Nazirliyinin mütəxəssis eksperti, infeksionist Təyyar Eyvazov bildirib.

Nazirlik rəsmisi uzun müddətdir yeni yoluxma hallarının sayının minimal-iki rəqəmli həddə olduğunu vurğulayıb:

“Yoluxan insanların böyük əksəriyyəti xəstəliyi yüngül keçirir, xəstəxanalara yatış sayı çox az həddədir. Hətta bir neçə vaxt davam edən bayram günlərində insanlar arasında təmasların sayının artmasına baxmayaraq, yoluxma hallarında artım müşahidə edilmədi. Bu onu deməyə əsas verir ki, vəziyyət kifayət qədər dayanıqlıdır. Səbəb isə əhalinin əksər hissəsində xəstəliyə qarşı immunitetin formalaşmasıdır ki, bu da bir tərəfdən xəstəliyi keçirmə, digər tərəfdən isə və əsasən kütləvi vaksinasiya hesabına əldə edilib”.

“Təsadüfi deyil ki, Nazirlər Kabineti son vaxtlarda karantin rejiminin yumşaldılması istiqamətində qərarlar qəbul edir və son günlərdə də bu istiqamətdə addımlar atılmaqdadır”,- T.Eyvazov əlavə edib.