“Ən çox ölümə səbəb olan bu xəstəliklərin sığortada olmaması başadüşülən deyil”

en-cox-olume-sebeb-olan-bu-xesteliklerin-sigortada-olmamasi-basadusulen-deyil
Oxunma sayı: 5148

“Biz toxuma transplantasiyasında geri qalmışıq. İspaniya bu sahədə liderlik edir”.

“Qafqazinfo” xəbər verir ki, bu fikirləri Milli Məclisin Səhiyyə komitəsinin sədri Əhliman Əmiraslanov bu gün İcbari Tibbi Sığorta üzrə Dövlət Agentliyinin (İTSDA) media nümayəndələri üçün Xidmətlər Zərfinin təqdimatına dair tədbirində çıxış edərkən deyib.

O bildirib ki, Azərbaycan bu mövzuda çox geridə qalır: “İki il bundan öncə biz Milli Məclisdə orqan transplantasiyası ilə bağlı qanun qəbul etdik. Artıq bu qanunun işləmə mexanizmi Səhiyyə Nazirliyi tərəfindən hazırlanıb. Bu gün ölkəmizdə orqan və toxumaların köçürülməsi üçün mövcud olan problemlərin böyük hissəsi aradan qaldırılıb. Lakin orqan və toxuma transplantasiyası ilə bağlı məhdudiyyətlər var, bu məni narahat edir. Mən başa düşürəm ki, maliyyə cəhətdən limit var, digər tərəfdən klinikaların imkanları məhduddur.

Bizdə bu gün sümük iliyi, qaraciyər transplantasiyasına icazə verilsə də, nə bizdə bu sahədə peşəkar kadrlar kifayət qədər var, nə də tibb müəssisələri o imkanlara malikdir. Əgər biz geniş imkanlarla gələcəkdə orqan və toxuma transplantasiyalarının aparılmasına icazə versək, xidmət səviyyəsi yüksək olan tibb müəssisələri tapmaq olar. Əvvəl heç bir orqan transplantasiyası olmadığı halda bu gün il ərzində 20 nəfər də olsa, bu xidmətdən yararlana bilər. Nəzərə alaq ki, bu əməliyyatlar 200-250 min dollar civarındadır. Görün nə qədər insan bu xidməti gözləyir. Düşünürəm ki, dövlət tərəfindən və əhalidən toplanan vəsaitlərlə mürəkkəb transplantasiyaları həyata keçirəcək, geniş imkanları olan tibb müəssisələrinə ehtiyac var. Bəzi xəstəxanalarda artıq növbələr dolub və yer yoxdur”.

Ə.Əmiraslanov əlavə edib ki, Xidmətlər Zərfinə beynin xoşxassəli şişləri ilə bağlı bir məqam salınıb: “Mən hesab edirəm ki, bizdə icbari tibbi sığortadan kənarda heç bir patalogiya, xəstəlik qalmamalıdır. Dünyada əhali arasında ən çox ölümə səbəb olan iki xəstəlikdən birinin də icbari tibbi sığortada olmaması başadüşülən deyil, təəssüf doğurur. Bilirsiz ki, onkoloji xəstəliklərin müalicəsi ciddi vəsait tələb edir. Bu gün onkoloji xəstəliklərin müalicəsinə 50 milyonluq vəsait ayrılıb, amma bu xəstələrin sayı ilə düz gəlmir. Bir ailədə iki xəstə varsa, biri ürək, digəri onkolojidən əziyyət çəkirsə, ürək problemi olan icbari tibbi sığorta hesabına əməliyyat olub həyata qayıdır. Onkoloji xəstə isə qalır ki vəsaiti haradan tapım?!”

Gülnar Əliyeva