“Huawei” və “Xiaomi” şirkətləri yeni qatlanan smartfonlarını təqdim edərək Çinin premium telefon bazarında rəqabəti daha da kəskinləşdiriblər.

“Qafqazinfo” xəbər verir ki, bu barədə “Reuters” agentliyi məlumat yayıb.

Bildirilib ki, bu təqdimatlar “Apple”ın ayın 9-na planlaşdırılan tədbirindən dərhal əvvələ təsadüf edib.

“Huawei”in iki dəfə qatlanan və açıldıqda planşet ekranına çevrilən yeni “Mate XT2” seriyası “Kirin 9050 Pro” çipi, yenilənmiş şarnir mexanizmi, təkmilləşdirilmiş suya davamlılıq və kənar şəxslərin ekranı görməsini əngəlləyən gizlilik funksiyası ilə təchiz olunub.

Cihazların qiyməti 19 999 yuandan (təxminən 2 980 dollar) başlayır, ən üst modeli isə 24 999 yuana (təxminən 3 725 dollar) təklif olunur. Smartfonların satışı sentyabrın 12-də başlayacaq.

“Hazırda qiymət təyini böyük çağırışdır, çünki yaddaş komponentlərinin maya dəyəri kəskin artıb. Məhsulda çoxlu yeni texnologiyalar tətbiq etdiyimiz üçün xərc təzyiqi həddindən artıq yüksək oldu”, – deyə “Huawei”in icraçı direktoru Riçard Yu bildirib.

Şirkətdən verilən məlumata görə, yeni çip arxitekturası daha az enerji sərfiyyatı ilə yüksək hesablama gücü təmin edir. “LogicFolding” adlanan bu arxitektura “Huawei”in ABŞ-nin qabaqcıl texnologiyalara çıxışa tətbiq etdiyi məhdudiyyətləri dəf etmək məqsədilə may ayında elan etdiyi “Tau Scaling Law” konseptinin bir hissəsidir.