Çoxsaylı mətbuat orqanları arasında özünəməxsus yer tutan, dövlətçiliyimizin inkişafına davamlı töhfələr verən, oxucu auditoriyasını günbəgün genişləndirən “İki sahil” qəzetinin ilk nömrəsinin işıq üzü gördüyü 1991-ci il 10 iyul tarixindən 32 il ötür.

“İki sahil” Azərbaycanın ən çətin dövründə həyata vəsiqə aldı. O dövrün reallıqlarını ictimaiyyətə çatdırmaqdan çəkinmədi, öz ideallarına sadiq qalaraq sınaqlardan şərəflə çıxdı. O dövrdə “İki sahil” öz səhifələrində reallıqları olduğu kimi oxuculara çatdıraraq, Azərbaycanın xilaskarının ümummilli lider Heydər Əliyev olduğunu qətiyyətlə bəyan edirdi. Azərbaycan xalqının böyük əksəriyyətinin ifadəsi olan 91 nəfər ziyalının   dahi şəxsiyyət  Heydər Əliyevə "Azərbaycan Sizin sözünüzü gözləyir" müraciəti qəzetin səhifələrində yer aldı. “İki sahil” bütün çətinliklərə, təzyiqlərə rəğmən qarşısına qoyduğu məqsədə doğru inamla addımladı,  cəmiyytin güzgüsü missiyasını şərəflə yerinə yetirdi.

Ümummilli lider YAP-ın yaradılmasının ildönümü münasibətilə keçirilən ümumrespublika müşavirəsində “İki sahil” qəzetinin rolunu yüksək dəyərləndirib: “O vaxt “İki sahil” qəzeti yaranmışdı. Mən hesab edirəm ki, bu qəzet də çox iş görmüşdür. Bu qəzet indi də Yeni Azərbaycan Partiyasına xidmət edir. Amma o vaxt bu partiya yox idi, lakin “İki sahil” qəzeti çox cəsarətli məqalələr verirdi. Mən təkcə Naxçıvanı götürmürəm, ədalətsiz hadisələrə qarşı Azərbaycanın ayrı-ayrı vətəndaşlarının, ziyalılarının fikrini dərc etməkdə bu qəzet yaxşı fəaliyyət göstərmişdir, indi də göstərir. Mən bunu da yüksək qiymətləndirirəm.”

1993-cü ildə dahi şəsiyyət Heydər Əliyevin hakimiyyətə qayıdışından sonra ölkəmizin həyatında baş verən köklü islahatlar mətbuatdan da yan keçmədi. Dövlətin azad mətbuatın inkişafı istiqamətində atdığı addımlar “İki sahil”in fəaliyyətinin daha da genişləndirməsində öz sözünü dedi.

32 il bir mətbu orqan üçün həm təqdimat, həm də zəngin yol keçərək sabahı üçün möhkəm  baza formalaşdırması baxımından böyük rəqəmdir. “İki sahil” yarandığı dövrün çətinliklərinə uğurla dəf edərək cəmiyyətin hər bir üzvünün arzu və istəklərini ifadə edən bir tribunaya çevrilib. Azad sözə, fikrə dəyər qəzetin  fəaliyyətində özünün aydın ifadəsini tapır.

Qəzetin fəaliyyətini fərqləndirən mühüm xüsusiyyətlərdən biri Azərbaycanın dövlət quruculuğu prosesinin bütün mərhələlərini öz prinsiplərinə müvafiq əks etdirməsidir. Müasir dövlət quruculuğu prosesləri, Prezident İlham Əliyevin yürütdüyü uğurlu daxili və xarici siyasət, Azərbaycan mədəniyyətinin, incəsənətinin, təhsilinin inkişaf mərhələləri qəzetdə dolğun şəkildə əks etdirilir. Ölkə rəhbəri möhtərəm İlham Əliyevin həyata keçirdiyi uğurlu inkişaf strategiyası, Heydər Əliyev Fondunun təhsil, mədəniyyət və s. sahələrdə reallaşdırdığı layihələr qəzetin səhifələrində xüsusi yer tutur.

Qəzetin “ikisahil.az” internet saytı uğurla fəaliyyət göstərir. Dövrün, zamanın tələblərinə uyğun olaraq yenilənən internet səhifəsində günün aktual məsələlərinin təhlili, ölkə daxilində və onun hüdudlarından kənarda baş verən hadisələr  operativ şəkildə oxuculara çatdırılır. “İki sahil” İnternet Televiziyası da uğurla fəaliyyət göstərir. Günün aktual məsələləri ilə bağlı, ictimai-siyasi, iqtisadi və digər mövzularda müxtəlif sahələri əhatə edən verilişlərin yayımlandığı “İki sahil” internet televiziyası da izləyicilərin böyük rəğbətini qazanıb.

"İki sahil" ölkə iqtisadiyyatının inkişafında aparıcı rol oynayan, ümummilli lider Heydər Əliyevin müəllifi olduğu neft strategiyasının  həyata keçirilməsinə davamlı töhfələr verən  SOCAR-ın  təsisçiliyi ilə fəaliyyət göstərir.  SOCAR  Prezident İlham Əliyevin tapşırıqlarını uğurla yerinə yetirərək bu gün dünyanın ən modern şirkətləri ilə bir sırada dayanır. Qəzet SOCAR-ın uğurlu fəaliyyətini  təsisçisi olmaqla yanaşı həm də dayanıqlı iqtisadi inkişafımızda böyük rol oynayan  şirkət olaraq dəyərləndirir, gördüyü genişmiqyaslı işləri ictimaiyyətə çatdırmaqdan qürur duyur.

"İki sahil" gənc jurnalistlər üçün böyük məktəbdir. Məsuliyyət peşəkarlığın açarıdır. Mətbuatın əsas prinsiplərini fəaliyyətinin önündə saxlayan “İki sahilçi”lər 32 ilin işığında növbəti illərə doğru uğurla addımlayır. Qəzetin ötən 32 ildə keçdiyi zəngin və şərəfli tarix böyük təcrübə, gələcək üçün möhkəm təməldir.

“Qafqazinfo” kollektivi adından həmkarlarımızı təbrik edirik!