Milli Məclisin deputatı, Demokratik Maarifçilik Partiyasının sədri Elşən Musayev Gültəkin Hacıbəylinin malik olduğu iddia edilən əmlakların siyahısının da əks olunduğu müəllif yazısı yazıb.

“Qafqazinfo” “Musavat.com”a istinadən deputatın yazısını təqdim edir:

“Ay Gültəkin, vay Gültəkin...

Nə günlərə qaldın sən?

Eqo, hikkə, təkəbbür səni haralara qədər endirdi, hansı rəzilliklərə qədər yuvarladı?

Bədbəxt adam!

Bir xəyanət qalmışdı, artıq o mövzuda da ismin keçir... 

Hərgah, niyə və nəyə təəccüblənirik?!

Gültəkin – həmin Gültəkindir ki, bir vaxtlar YAP-ın mitinqində söylədiyi nitqi 10 il sonra nöqtəsinə - vergülünə belə toxunmadan “Milli Şura”nın mitinqində təkrarlamağı bacarıb.

Gültəkin – həmin buqələmundur ki, ingilis dili müəllimliyindən “ingilis bayrağı”na qədər böyük  bir yol qət edib.

Gültəkin – həmin “işbaz”dır ki, vaxtilə deputat seçildiyi dairədəki obyektlərinin sayı seçicilərinin sayından daha çox olub.

Gültəkin – həmin nankordur ki, rəhmətlik Anar Məmmədxanovun yasında: “Hakimiyyət əlimdən hər şeyi alıb, sadəcə aylıq 30 - 40 minlik cib xərci (!) saxlayıb” - şikayətində bulunub. Riyakarcasına. Meşşancasına. Utanmazcasına.

(Haqqında bəhs etdiyi 30 - 40 min isə...kirayə verdiyi obyektlərdən və mənzillərdən gələn vəsait imiş)   

Gültəkin – həmin saxtakardır ki, onu bu gün danışdıran səbəb - nə millət sevgisidir, nə də iddia elədiyi və guya dözə bilmədiyi haqsızlıq.

Onu danışdıran - MANDATSIZLIQDIR!

Sadəcə və sadəcə mandatsızlıq!

***

Təxminən 2 il əvvəl, Amerikadan veriliş yayımlayan “çeburaşka” (oxu: Sevinc Osmanqızı) Hacıbəyliyə sual ünvanlamışdı ki, necə oldu, müxalifətə keçdiniz?

Adam belə bir cavab vermişdi: “Adımı təmizləmək üçün...”

Riyakar insan!

Gəl, sənə “təmiz” və “sadə” keçmişindən sadəcə qısa ştrix(lər) xatırladım:

Dövlətdən alınan 3 mənzil.

Dilarə Əliyeva küçəsində (179 və 187 kv.m) 2 mənzil.

Yasamal rayonu, İnşaatçılar Prospektində (72 kv. m) 1 mənzil.

Səbail rayonu, Mehdi Hüseyn küçəsində (120 kv.m) 1 mənzil.

Nəsimi rayonu, Səməd Vurğun küçəsində (150 kv.m) 1 mənzil.

Şeyx Şamil küçəsində ucu - bucağı olmayan ofis.

Mehdiabadda (12 + 12 + 9), Goradildə 30, Xırdalanda 60, Şamaxının Qalebuğurd kəndində 12 sot torpaq.

Goranboyun az qala yarısı, restoranlar, daş karxanaları, su dəyirmanları...

Və daha bilmədiyimiz nələr - nələr...

2 çağırış deputatlıq müddətində icra başçıları, nazirlər, iş adamları sənin əlindən dad çəkib e, dad – ay “təmiz adam”!

Xəbərin varmı?!

İllərlə çökmüsən, hamının üzərinə. Tutduğundan qamarlamısan, tutmadığını, əlinə keçməyəni isə... ya “qaralamısan” ya şantaj eləmisən, ya da sonrakı etapa saxlamısan - Ramiz “dayı”sının ərköyün balası! 

Fərqindəsənmi?!  

Xatırlayıram, bir dəfə Cəmil Həsənli də oxşar mövzuda pafos üfürmüşdü. Ki, “Prezidentin verdiyi ordendən imtina edirəm...”

Və o zaman dediyim sözləri yenidən bu minsifətlilərin (həm yaramaz Gültəkinin, həm də “siyasi bomj” Cəmilin) yadına salmaq istəyirəm: Cəsarətiniz varsa, deputat kimi dövlətdən aldığınız evlərdən, bağlardan imtina edin. Elə təpərlisinizsə, bəyənmədiyiniz Parlamentin keçmiş mandatından, həmin mandatın sizə qazandırdığı, qazandıracağı imtiyazlardan (konkret: pensiyadan) imtina edin.

Hünəriniz çatırsa, 5-cə il müddətində yırtıcı kimi yağmaladığınız obyektlərdən imtina edin. Əlqərəz, pulla, maddiyyatla bağlı nədənsə imtina edin...

Edərsinizmi? Edə bilərsinizmi? - Əsla!

Çünki, “maraq adamı”sınız. Çünki, sizin “sədaqətiniz” işiniz keçənə qədərdir.

Çünki namərdsiniz, nanəcibsiniz, nankorsunuz!

Çünki xəyanətkarsınız!

***

Ona görə də bilin və agah olun:

Nə hazırda tökdüyünüz “timsah göz yaşları” köməyinizə çatacaq.

Nə də İstanbuldan, deportasiya otağından açıqlamalar yayıb, 2 dövlət arasındakı münasibətləri şantaj etməyə yönəlmiş uğursuz, məkrli cəhdləriniz...

***

Gələcəksən, Gültəkin!

Quzu balası kimi gələcəksən!

Az qaldı.

Əmin ol...”