Almaniya Şəhərlər və Bələdiyyələr Assosiasiyası ölkədə dərinləşən tənhalıq problemi ilə mübarizə aparmaq və qonşuluq mədəniyyətini gücləndirmək üçün 500 milyon avroluq xüsusi dəstək fondunun yaradılmasını tələb edir.

“Qafqazinfo”nun məlumatına görə, assosiasiyanın baş meneceri Andre Berqhegger bildirib ki, tənhalıq təkcə fərdi seçim deyil, cəmiyyətin bütün təbəqələrini əhatə edən sosial böhrandır.

Onun sözlərinə görə, bu problemlə mübarizə üçün görülən tədbirlər maliyyə məhdudiyyətlərinə qurban verilməməlidir və hazırkı seçki dövründə konkret büdcə ayrılmasına ehtiyac var.

O vurğulayıb ki, tənhalığın ilk hiss edildiyi və ən sürətli müdaxilənin mümkün olduğu yerlər bələdiyyələrdir. O, kitabxanalar və dövlət təhsil mərkəzlərinin yalnız təhsil ocaqları deyil, eyni zamanda, insanların bir araya gəldiyi vacib sosial məkanlar olduğunu qeyd edib.

Bu məkanların fəaliyyətini davam etdirməsi üçün Avropa Birliyi vəsaitləri və ya milli büdcə düzəlişləri ilə davamlı maliyyələşmənin təmin olunması vacib sayılır.

Mütəxəssislər bildirirlər ki, tənhalıq artıq yalnız yaşlıları əhatə etmir, bütün yaş qruplarını təsir edən nəsillərarası problemə çevrilib.

Bu hiss fərdlərin arzuladığı sosial əlaqələrlə real münasibətləri arasındakı fərq artdıqca dərinləşir. Sosial əlaqələri gücləndirməyə yönəlmiş addımlar isə təkcə fərdi rifah üçün deyil, cəmiyyətin ümumi psixi sağlamlığı və həmrəyliyi üçün də böyük əhəmiyyət daşıyır.