Xəzər dənizi regionunda iqlim dəyişmələri mövzusunda tədbir keçirildi - Fotolar

xezer-denizi-regionunda-iqlim-deyismeleri-movzusunda-tedbir-kecirildi
Oxunma sayı: 2185

Birləşmiş Ərəb Əmirliklərinin Dubay şəhərində davam edən BMT-nin İqlim Dəyişmələri üzrə Çərçivə Konvensiyasının 28-ci sessiyası çərçivəsində Azərbaycan pavilyonunda növbəti tədbir baş tutub.

“Qafqazinfo” xəbər verir ki, Xəzər dənizi regionunda iqlim dəyişmələrinin təsirlərinə uyğunlaşma mövzusunda Ekologiya və Təbii Sərvətlər Nazirliyi ilə “Xəzər dənizinin dəniz ətraf mühitinin mühafizəsi haqqında” Çərçivə Konvensiyası” Katibliyinin birgə təşkilatçılığı ilə tədbir keçirilib.

Tədbirdə Xəzəryanı ölkələrin, BMT-nin Ətraf Mühit və Məskunlaşma proqramlarının yüksək səviyyəli rəsmiləri iştirak edib.

Ekologiya və təbii sərvətlər naziri Muxtar Babayev iqlim dəyişmələri nəticəsində son illərdə Xəzər dənizinin səviyyəsində baş verən dəyişikliyə diqqət çəkərək, bu unikal ekosistemin qorunması ilə bağlı regional əməkdaşlığın vacibliyini vurğulayıb.

Panel sessiyaları ilə davam edən tədbirdə Ekologiya və Təbii Sərvətlər Nazirliyi, BMT-nin Ətraf Mühit və Məskunlaşma proqramları və Xəzər dənizinin Hidrometeorologiyası üzrə Koordinasiya Komitəsinin nümayəndələri tərəfindən təqdimatlar edilib, mövzu ətrafında müzakirələr aparılıb.