Müğənni Sevda Sanaliyevanın “Qafqazinfo”ya müsahibəsi:
- Yaradıcılıq fəaliyyətiniz davam edirmi? Yoxsa ana olmağınızla bağlı fasilə vermisiniz?
- Çətin hamiləlik keçirirəm. Lakin yaradıcılıq fəaliyyətimi bacardıqca davam etdirirəm. Hazırda daha çox istirahətə üstünlük verirəm.
- Keçən ilin sonlarında sizi şantaj etdikləri ilə bağlı məlumat vermişdiniz. O məsələ necə bitdi?
- Keçən ilki hadisələr keçən ildə qaldı. İndi yeni həyata yeni qərarlarla başlamışam. İnşallah xeyirlisi olar.
- Gizli ailə qurmağınıza səbəb nə idi?
- Əslində ailəni gizli qurmadım. Yaxınlarım, dostlarım və sənət dostlarım yanımızda idilər. Mən də, yoldaşım da toyumuzun efirdə yayımlanmasını və qəzetlərdə, saytlarda yazılmasını istəmədik. Özəl həyatımızın müzakirə olunmasının tərəfdarı deyilik.
- Bir az ailə həyatınızdan danışın.
- Ailə həyatımız normal keçir. Hamıda necədirsə, bizdə də elədir. Heç bir qeyri-adilik yoxdur.
- Həyat yoldaşı Sevdaya hansı qadağaları qoyub?
- Həyat yoldaşım mənə qadağa qoymur. Əslində mənə qadağa qoymasına ehtiyac yoxdur. O nə deyirsə, edirəm. İstəmədiyi heç nəyi etmirəm.
- Sevda xoşbəxtdirmi?
- Şükür Allaha ki, xoşbəxtəm. Bütün xanımlara xoşbəxt olmağı arzulayıram.
- Analıq necə hisdir?
- Hələ ki, özümü ana kimi hiss etmirəm, çünki tezdir. Övladıma nəsə olar deyə daha çox həyəcan və qorxularım var. Təki salamatçılıq olsun.
- Körpənizin cinsiyyəti bəllidirmi?
- Cinsiyyəti hələ bəlli deyil. Qız və ya oğlan olmasının fərqi yoxdur. Əsas salamat və xeyirli övlad olsun. Allah bilən məsləhətdir.
- Evləndikdən, ana olduqdan sonra həyatınızda nələr dəyişdi?
- Ailəli olmaq, ana olmaq hər ikisi məsuliyyət deməkdir. Hər şeyə, danışığıma, hərəkətlətimə daha çox diqqət edirəm.
- Modanı izləyirsinizmi? Geyim seçərkən nələrə diqqət edirsiniz?
- Dəb mənim üçün mənə yaraşan geyim deməkdir. Amma dəblə uyğunlaşmağa da çalışıram. Kilo aldığım üçün nə geyinsəm, özümə yaraşdırmıram. Ona görə də geyim seçmirəm.
- Rəqqasə olmaq çətindir, yoxsa müğənni?
- Rəqqasə olmaq müğənni olmaqdan daha çətin idi. Amma müğənnilik də asan deyil. İnsanların qəlbinə yol tapmaq, seçdiyin, oxuduğun mahnıların sevilməsi çox vacibdir. Əsas da insanların qəlbində qalmağı bacarmalısan.
- İncəsənət adamları hər zaman birmənalı qarşılanmayıb. Sizcə buna səbəb nədir?
- Meşə çaqqalsız olmur. Hər işdə olduğu kimi bizim sənətdə də pisi və yaxşısı var. Buna görə hamıya eyni gözlə baxmaq düzgün deyil.
- Ananızın xərçəng olduğunu söyləmişdiniz. İndi səhhəti necədir?
- Anamın böyrəyində xərçəng var idi. Əməliyyatla götürdülər. Hazırda vəziyyəti ağır olaraq qalır. Allaha anama şəfa versin. Bütün anaları övladlarına bağışlasın.Amin...
Könül