“Boşanmaların səbəblərindən biri də sonsuzluqdur”

bosanmalarin-sebeblerinden-biri-de-sonsuzluqdur
Oxunma sayı: 1650

““Reproduktiv sağlamlıq haqqında” Qanunun qəbul olunması Milli Məclis qarşısında duran vəzifələrdən biridir”.

“Qafqazinfo” xəbər verir ki, bu fikirləri Milli Məclisin Sosial qanunvericilik şöbəsinin müdiri Adil Vəliyev parlamentdə “Ailə sağlamlığı və dəyərləri qanunvericilik aspektində” mövzusunda keçirilən ictimai dinləmədə bildirib.

“Məsələn, nikaha xitam verilməsinin səbəblərindən biri də sonsuzluqdur, lakin müasir dünyada hər bir insanı valideyn edən tibbi üsul - süni və ekstrokorporal mayalanma metodu geniş tətbiq olunur ki, qanun layihəsi də məhz bu tələblər çərçivəsində hazırlanıb.

Daha ciddi problemlər də mövcuddur, məsələn, bir çox ailələrdə qadınların reproduktiv sağlamlıq hüquqlarının qorunmaması, ailə üzvlərinin istəyinə əsasən qadının hamiləliyini süni şəkildə dayandırmağa məcbur edilməsi, bəzən də qadının yalnız qız uşaqları dünyaya gətirdiyi üçün tərk edildiyi hallar bu sənədin qəbulu ilə problemin hüquqi tənzimlənməsini vacib edir. Qanunun əsas özəlliyi də bu problemin həllində ailə planlaşdırmasının əlavə mexanizm kimi təsbit olunmasıdır.

Ailə institutunun möhkəmləndirilməsi üçün bir çox təşkilati hüquqi tədbirlər görülsə də, təbii ki, tam deyil. Bu, davam edən və daim təkmilləşən proses olmalıdır”, - deyə şöbə müdiri vurğulayıb. 

Zaur Mirzə