“TƏBİB digər səhiyyə qurumları ilə yanaşı, COP29 tədbiri günlərində zəruri tibbi xidmətlərin keyfiyyətli şəkildə təmin olunması üçün üzərinə düşən öhdəlikləri lazımi səviyyədə təşkil edib”.

“Qafqazinfo” xəbər verir ki, bunu TƏBİB-in icraçı direktoru Vüqar Qurbanov Yeni Klinikada tibbi xidmətlərin təşkilinə həsr olunmuş brifinqdə bildirib.

O qeyd edib ki, bu istiqamətdə Səhiyyə Nazirliyi və COP29 Əməliyyat şirkəti ilə koordinasiyalı olaraq çalışırlar: “COP29 Əməliyyat şirkətinin tibb komandası ilə tədbir üçün ayrılan və TƏBİB-in tabeliyində fəaliyyət göstərən tibb müəssisələrinin hər birinə baxış keçirilib və müəssisələrimiz zəruri tibbi xidməti təmin edə bilmək üçün hazır vəziyyətə gətirilib. Bütün bu aylar ərzində mütəmadi görüşlər keçirilib, tibb və qeyri-tibb personalı üçün treninqlər təşkil olunub”.

V.Qurbanov tibb müəssisələrinin hazır vəziyyətə gətirildiyini açıqlayıb: “Yeni Klinikanın Təcili və təxirəsalınmaz tibbi yardım şöbəsində xüsusi monitor və oksigen panelləri ilə təmin olunmuş 10 çarpayı, Uşaq təcili tibbi yardım şöbəsində 3, Stasionar şöbədə 10, Reanimasiya şöbəsində 4, Uşaq reanimasiya və intensiv terapiya şöbəsində 3 çarpayı və 1 əməliyyatxana tibbi xidmətə zərurət ehtimalını nəzərə alaraq tədbir üçün ayrılıb.

COP29 tədbirinin keçirildiyi müddət ərzində fövqəladə hallar baş verərsə, Sabunçu Tibb Mərkəzinə təhkim edilən Məhəmmədi modul tipli xəstəxanada reanimasiya və stasionar tipli olmaqla fövqəladə hallar üçün 370 çarpayı təmin edilib.

COP29 tədbiri dönəmində hava-damcı yolu ilə yayılan infeksion xəstəliklərlə yoluxanlara keyfiyyətli xidmət üçün Kliniki Tibbi Mərkəzin nəzdində modul tipli xəstəxanada 10 çarpayı ayrılıb”.

V.Qurbanov əlavə edib ki, yanıq xəsarətləri üzrə ehtimalları nəzərə alaraq keyfiyyətli tibbi xidmət göstərmək məqsədilə Mərkəzi Neftçilər Xəstəxanasında bütün zəruri tibbi avadanlıqlarla təchiz olunmuş Yanıq şöbəsi yaradılıb: “Zəhərlənmə ehtimalları üzrə Kliniki Tibbi Mərkəzin Toksikologiya şöbəsində müvafiq tibbi xidmətin göstərilməsi üçün çarpayılar ayrılıb.

Dövlət Turizm Agentliyi ilə əməkdaşlıq çərçivəsində COP29 ilə əlaqədar Atletlər kəndində gələcək qonaqların təhlükəsizliyinin təmin edilməsi, təcili tibbi yardım xidmətlərinin təşkil olunması və tibb məntəqəsinin qurulmasına dair işlər görülüb.

Tədbir zamanı təcili tibbi yardım göstərəcək 60 briqada (həkim, orta tibb işçisi, sürücü) üçün nəzərdə tutulan əməkdaşların siyahısı hazırlanıb, eləcə də nəzərdə tutulan 60 ədəd yeni ambulans (İVECO markalı) artıq təhkim olunub. Onu da qeyd edim ki, COP29 tədbiri ilə bağlı həm ayrılmış hotellərdə,həm də tədbirin keçirildiyi məkanda təcili və təxirəsalınmaz tibbi yardım briqadaları xidmət edəcək. Bütün nöqtələr üzrə ambulanslar hərəkət edəcəyi halda isə, əvəzedici ehtiyatambulans və briqadalar da hazır vəziyyətə gətirilib.

Təcili və təxirəsalınmaz tibbi yardım (TTTY) xidməti göstərəcək heyət üçün nəzərdə tutulan təməl və təkmil həyat dəstəyi üzrə təlimlər keçirilib, 488 nəfər artıq təlimləri uğurla başa vurub. Bura həkimlər, orta tibb işçiləri və sürücülər daxildir. Dil bilgilərini təkmilləşdirmək üçün ingilis dili kurslarında isə 331 nəfər iştirak edib”.

İcraçı direktor əlavə edib ki, COP29 dövründə baş verə biləcək bütün fors-major hadisələrə hazırıq:

O qeyd edib ki, tibbi xidmətin təşkili ilə bağlı ciddi bir sıxıntı yoxdur: “Bu, mötəbər tədbir olduğuna görə bir az da ciddi yanaşılıb. Əgər fors-major hal olarsa, bütün tibbi heyət hazır vəziyyətə gətirilib”.

Vüqar Qurbanov bildirib kii, COP29 çərçivəsində tibbi xidmət sahəsində istifadə üçün ölkəyə elektriklə işləyən 5 ədəd təcili tibbi yardım elektromobil gətirilib: “Hazırda sınaq prosedurları həyata keçirilir. Test olunduqdan sonra aidiyyəti üzrə istifadə edilməsi nəzərdə tutulub”.

***

TƏBİB-in icraçı direktorunun müavini Araz Nəsirov isə qeyd edib ki, COP29 konfransına hazırlıq çərçivəsində “Koroğlu”, “28 May”, “Elmlər Akademiyası” metrostansiyalarında tibb məntəqələri təşkil edilib.

Həmin metrostansiyalarda COP29 konfransı çərçivəsində 18 həkim, 18 orta tibbi işçisi fəaliyyət göstərəcək. Həmçinin “MİDA” Yaşayış Kompleksində də yeni tibb məntəqəsi yaradılıb.

Gülnar Əliyeva