Hərbi vəzifəlilərin təlimi başa çatdı - Video

herbi-vezifelilerin-telimi-basa-catdi
Oxunma sayı: 1476

Müdafiə nazirinin təsdiq etdiyi 2023-cü il üçün hazırlıq planına əsasən, Azərbaycan Ordusunda bir qrup hərbi vəzifəlilərin iştirakı ilə “N” hərbi hissəsində keçirilən təlim toplanışı başa çatıb.

Müdafiə Nazirliyindən (MN) “Qafqazinfo”ya verilən məlumata görə, nazir müavini - Quru Qoşunların komandanı general-leytenant Ənvər Əfəndiyev təlim toplanışın keçirildiyi əraziyə gələrək təlim prosesinin gedişatı ilə maraqlanıb.

Hərbi vəzifəlilərin bilik və bacarıqlarının təkmilləşdirilməsi, eləcə də təlimlərin daha da səmərəli keçirilməsi ilə bağlı öz tövsiyələrini verib.

Təlim toplanışının başa çatması münasibətilə bağlanış mərasimi keçirilib.
Çıxış edənlər keçirilən təlimlərin döyüş hazırlığının yüksək səviyyədə saxlanılması və şəxsi heyətin peşəkarlığının artırılması baxımından müstəsna əhəmiyyətə malik olduğunu vurğulayıblar.

Sonda təlim toplanışında fərqlənənlərə fəxri fərmanlar təqdim olunub.
Qeyd edək ki, hərbi vəzifəlilərin döyüş hazırlığı səviyyəsinin artırılması məqsədilə keçirilən toplanışda atıcı silahlardan və qumbaraatanlardan atış çalışmaları yerinə yetirilib, həmçinin sıra, taktiki, hərbi tibbi və ixtisas hazırlıqlarından nəzəri və praktiki məşğələlər təşkil olunub.