Kürdə batan üç yeniyetmənin kimliyi məlum oldu - Yenilənib

kurde-batan-uc-yeniyetmenin-kimliyi-melum-oldu
Oxunma sayı: 10631

Fövqəladə Hallar Nazirliyinin (FHN) "112" qaynar telefon xəttinə Kür çayının Neftçala rayonunun Cəngan kəndi ərazisindən keçən hissəsində 3 nəfərin batması barədə məlumat daxil olub.

“Qafqazinfo” xəbər verir ki, məlumatla əlaqədar FHN-nin Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-axtarış qrupu axtarışlara cəlb olunub.

İyunun 16-da axşam saatlarında Kür çayının Neftçala rayonunun Cəngan kəndi ərazisindən keçən hissəsində batan 3 nəfərdən ikisinin meyiti Fövqəladə Hallar Nazirliyinin dalğıc-xilasediciləri tərəfindən tapılaraq çıxarılıb və aidiyyəti üzrə təhvil verilib.

***

Neftçala rayonunun Cəngan kəndi ərazisində Kür çayında üç nəfərin batması ilə əlaqədar aparılan axtarış işləri yekunlaşıb.

“Qafqazinfo” xəbər verir ki, bu barədə Fövqəladə Hallar Nazirliyi məlumat yayıb.

Qeyd olunub ki, həyata keçirilən çevik və təxirəsalınmaz tədbirlər nəticəsində iyunun 16-da axşam saatlarında batan 3 nəfər yeniyetmənin meyiti dalğıc-xilasedicilər tərəfindən tapılaraq çıxarılıb və aidiyyəti üzrə təhvil verilib.

***

Kür çayında boğulan yeniyetmələrin adları məlum olub.

"Qafqazinfo" APA-ya istinadən xəbər verir ki, ölənlər Neftçala sakinləridir.

Cəngan kənd sakinləri 2007-ci il təvəllüdlü Əhmədov Siyasət Elşad oğlu, 2005-ci il təvəllüdlü Əhmədov Elşən Elşad oğlu və 2007-ci il təvəllüdlü Məlikov Teymur Seymur oğlu Kür çayının həmin kənddən keçən hissəsində çimərkən boğulublar.