İran Prezidenti Məsud Pezeşkian ABŞ vətəndaşlarına ünvanladığı xüsusi məktubda rəsmi Tehranın xarici siyasət kursu və dünya xalqları ilə münasibətləri barədə mühüm mesajlar verib.

“Qafqazinfo” “Tasnim”ə istinadla xəbər verir ki, dövlət başçısı İran xalqının Amerika, Avropa və ya qonşu dövlətlərin xalqlarına qarşı heç bir düşmənçiliyinin olmadığını bəyan edib.

Pezeşkian iranlıların tarix boyu xarici müdaxilələrə məruz qalsa da, həmişə hökumətlərlə xalqlar arasında fərq qoyduğunu vurğulayıb:

“İran müasir tarixində heç vaxt təcavüz, genişlənmə və ya müstəmləkəçilik yolunu seçməyib və heç vaxt müharibəyə başlayan tərəf olmayıb. Bizim istəyimiz qarşıdurma deyil, ləyaqət və qarşılıqlı anlaşma üzərində qurulan gələcəkdir”.

Prezident amerikalıları siyasi ritorikadan kənara çıxmağa və İranın reallıqlarını yenidən nəzərdən keçirməyə çağırıb.

O, iki ölkə arasındakı münasibətlərin dünyada ən çox səhv başa düşülən mövzulardan biri olduğunu qeyd edərək, ABŞ-ın regiondakı hərbi əməliyyatlarını sorğulayıb:

“Bu müharibə Amerika xalqının hansısa real maraqlarına cavab verirmi? Bu cür hərəkətlərə haqq qazandırmaq üçün İrandan hansı konkret təhdid gəldi?”

Xatırladaq ki, Pezeşkianın bu müraciəti ABŞ və İsrailin fevralın 28-dən etibarən İrana qarşı başlatdığı hərbi əməliyyatlar və regionda gərginliyin pik həddə çatdığı bir vaxta təsadüf edir.