“Qaçqınkom”dan Yasamaldakı məcburi köçkünlərin şikayətinə reaksiya

qacqinkomdan-yasamaldaki-mecburi-kockunlerin-sikayetine-reaksiya
Oxunma sayı: 2261

Qaçqınların və Məcburi Köçkünlərin İşləri üzrə Dövlət Komitəsi Yasamal rayonunda Azərbaycan Texniki Universitetinin və Azərbaycan Memarlıq və İnşaat Universitetlərinin yataqxanalarında müvəqqəti məskunlaşmış bəzi məcburi köçkünlərin şikayətlərinə münasibət bildirib. 

Qurumdan “Qafqazinfo”ya daxil olan məlumata görə, sözügedən ərazidə müvəqqəti məskunlaşmış və köçürülməsi ilə bağlı müəyyən problemlərlə qarşılaşan ailələrə yeni yaşayış sahəsi ilə təmin olunmamalarının səbəbi fərdi qaydada izah edilir: 

“Şikayətçilərdən Füzuli rayonundan məcburi köçkün Məmmədova Zeynəb İldırım qızı oğlunun ailəsi ilə birlikdə “Qobu Park-3” yaşayış kompleksində 3 otaqlı mənzillə təmin olunub. Ailə üzvlərinin sayı 5 nəfərdir. Zeynəb Məmmədova oğlunun ailəsi ilə bir mənzildə yaşamaq istəmir, özünə ayrı mənzil tələb edir.

Digər şikayətçi - Ağdam rayonundan məcburi köçkün Səfərova Münəvvər Paşa qızı həmin rayonun Ayaq Qərvənd qəsəbəsində 3 otaqlı evlə təmin olunub. Hazırda da həmin evdə qeydiyyatdadır. Bakıda əlavə evlə təmin olunmaq istəyir.

Şikayətçi - Füzuli rayonundan məcburi köçkün Şükürova Gülnur Nüsrət və onun həyat yoldaşı Hüseynov Təbriz Hüsən oğlu əvvəllər ayrı-ayrılıqda valideynləri ilə birgə yaşayarkən daimi qeydiyyatda olduqları rayonun ərazisində ailə tərkibində yeni yaşayış sahəsi ilə təmin olunublar. Bakıda əlavə evlə təmin olunmaq istəyir.

Şikayətçi - Hüseynova Nargilə Mürsəl qızı ailəli olub, bir müddət öncə boşanıb. O, özü və keçmiş həyat yoldaşı əvvəllər ayrı-ayrılıqda valideynləri ilə birgə yaşayarkən daimi qeydiyyatda olduqları rayonun ərazisində ailə tərkibində yeni yaşayış sahəsi ilə təmin olunublar. Hüseynova Nargilə boşandıqdan sonra valideynlərinin olduğu yerə - Füzuli rayonunun “Zobucuq-4” qəsəbəsində qeydiyyata düşüb. Şikayətçi Füzuli rayonundan məcburi köçkün Əliyeva Müşkinaz Mirzə qızı 5 nəfər ailə üzvü ilə birlikdə 3 otaqlı mənzillə təmin olunub. Lakin özü üçün ayrıca mənzil tələb edir.

Şikayətçi - Füzuli rayonundan məcburi köçkün Xudiyeva Elmira 6 nəfər ailə üzvü ilə birlikdə 4 otaqlı mənzillə təmin olunub. Onun da istəyi ayrıca mənzil almaqdır.

Füzuli rayonundan məcburi köçkün Bayramov Vəliməmməd Rza oğluna, onun həyat yoldaşı və qızı ilə birlikdə əvvəllər valideynlərinin ailə tərkibində yeni yaşayış sahəsi verilib. Bakıda əlavə evlə təmin olunmaq istəyir. 

Əsgərova Lətifə Əsgər qızının məcburi köçkün statusu yoxdur. O, çəkiliş zamanı iddia edir ki, Dövlət Komitəsinə dəfələrlə ərizə ilə müraciət edib. Lakin komitədə aparılmış araşdırma zamanı müəyyən olunub ki, bu iddialar əsassızdır”.