BANM-də “4SİM TALKS” adlı tədbir keçirilib - Fotolar

banm-de-4sim-talks-adli-tedbir-kecirilib
Oxunma sayı: 1281

Dördüncü Sənaye İnqilabının Təhlili və Koordinasiya Mərkəzi (4SİM) “4SİM Talks” adlı silsilə tədbirlərin keçirilməsinə start verib.

Bu təşəbbüsün əsas məqsədi universitetlər, dövlət və özəl sektor nümayəndələri arasında süni intellekt, əşyaların interneti, böyük verilənlər bazası, bulud texnologiyası, blokçeyn, 3D çap, virtual və artırılmış reallıq kimi 4-cü Sənaye İnqilabı texnologiyaları sahəsi üzrə maarifləndirməni artırmaq və karyerasını bu sahə üzrə davam etdirmək istəyən universitet tələbələri üçün uğurlu yol xəritəsini yaratmaqda kömək etmək və onlarla bu sahədə dünya təcrübəsini paylaşmaqdır.

“Qafqazinfo” xəbər verir ki, “4SİM Talks” adlı silsilə tədbirlərin ilk sessiyası Bakı Ali Neft məktəbində keçirilib. Tədbirdə BANM-in rektoru Elmar Qasımov günümüzdə süni intellekt texnologiyalarının tətbiqinin vacibliyini vurğulayaraq qeyd edib ki, Bakı Ali Neft Məktəbində də bu istiqamətdə mühüm işlər aparılır və yaxın gələcəkdə Ali Məktəbdə süni intellekt ixtisası, eyni zamanda Süni İntellekt Mərkəzi yaradılması planlaşdırılır. 

4SİM-in icraçı direktoru Fariz Cəfərov 4SİM-in fəaliyyəti, cari layihələri, Yeni Nəsil İqtisadiyyat Strategiyasında nəzərdə tutulmuş süni intellekt üzə təşəbbüslər, 4SİM ilə Dünya İqtisadi Forumu arasında əməkdaşlıq və müxtəlif sahələrdə süni intellektin tətbiqi, bu sahədə qanunvericilik və tənzimlənmə mexanizmləri ilə bağlı geniş məlumat verib.

Sonra 4SİM-in Süni İntellekt üzrə layihə rəhbəri Ruslan Zeynalzadə süni intellekt, onun tarixi və növləri haqqında, Dünya İqtisadi Forumun Süni İntellekt və Maşın Öyrənməsi platformasının rəhbəri Hubert Halope süni intellektin tətbiq sahələri, QSS şirkətinin rəhbəri Etibar Hüseynli süni intellektin təhsildə rolu, “Caspian Innovation Center” şirkətinin data mütəxəsisləri Ülvi Zamanbəyov və Əsəd Səfərov süni intellektin neft və qaz sektorunda tətbiqi, “Express Bank”ın data mütəxəssisi Təhminə Hüseynova süni intellektin bank sektorunda tətbiqi ilə bağlı təqdimatlar keçirərək tədbir iştirakçılarının suallarını cavablandırıblar.

Qeyd edək ki, 4-cü sənaye inqilabı texnologiyalarının tətbiqi sahəsində maarifləndirməni artırmaq məqsədi ilə “4SİM Talks” adlı silsilə tədbirlərin mütəmadi olaraq müxtəlif auditoriyalarda təşkil olunması nəzərdə tutulur.