Sənaya təcavüz edən xalası oğlu ilə bağlı hökm dəyişmədi

senaya-tecavuz-eden-xalasi-oglu-ile-bagli-hokm-deyismedi
Oxunma sayı: 5468

İctimai fəal Sənay Qəhrəmanlını (Sənay Yağmur) zorlamaqda ittiham olunan xalası oğlu Əsgər Ağazadə barəsindəki hökmdən verilmiş şikayətə baxılıb.

“Qafqazinfo” xəbər verir ki, Bakı Apellyasiya Məhkməsində keçirilən sonuncu iclasda qərar elan olunub.

Elbəy Allahverdiyevin sədrlik etdiyi hakimlər heyəti hökmün qanunauyğun olduğunu əsas gətirərək, şikayəti yekdilliklə rədd edib.  

Qeyd edək ki, 2004-cü il təvəllüdlü Sənay Qəhrəmanlı cinsi təcavüzə məruz qalması barədə hüquq-mühafizə orqanlarına müraciət edib. Müraciət əsasında Cinayət Məcəlləsinin 149.2.3-cü (təqsirkar şəxs üçün aşkar surətdə yetkinlik yaşına çatmayan şəxsə qarşı törədildikdə) maddəsi ilə cinayət işi başlanıb.

İstintaq nəticəsində Ə. Ağazadənin S. Qəhrəmanlıya cinsi təcavüz etməsinə əsaslı şübhələr müəyyən olunub.

Bakı Ağır Cinayətlər Məhkəməsinin hökmü ilə Əsgər Ağazadəyə 5 il həbs cəzası verilib.

Sənay Qəhrəmanlı siyasətçi Fuad Qəhrəmanlı və yazıçı Zümrüd Yağmurun qızıdır.