Ulduzlar sistemində beşinci yeri tutan Şir bürcü təxminən iyulun 23-dən avqustun 22-nə qədər olan dövrü (31 gün) əhatə edir. Ünsürü od, planeti Günəş, düşərli günü bazar, düşərsiz günü şənbə, uğurlu rəngi qızılı, narıncı, al, qara, uğursuz rəngi ağ, uğurlu daşı yantar, topaz, rubin, oniks, brilyant, metalı qızıl, enerji verən çiçəyi xrizantema, pion, uğurlu rəqəmi 1, 5, 9, 11, müxalif bürcü Sutökən, talismanı taclı inək, şir, qartal, şanslı ölkələri Fransa, Fransız Afrikası, İtaliya, Çexiya, Slovakiya, Antarktida, Arktika və Siciliyadır.

Tarixə səyahət

Misir ənənələrinə görə, Şir bürcünə Ulaq uyğun gəlir. Ulaq zəhmli və qorxu yaradan əbədilik allahı Setaya ibadət olunan müqəddəs heyvan sayılırdı. Hər adam onun xoş münasibətini qazana bilməzdi. Belə ki, Seta hər hansı dünyəvi və adi həyat gücünü Günəştək yandırmağa qadir idi. O, yalnız əbədi qüvvələri qəbul edirdi. Buna görə də onun himayədarlığı altında doğulanlar özünə və ətrafdakı insanlara qarşı həddən artıq tələbkar olmalı idilər. Bu insanlara qayda-qanunun keşikçisi rolu ayrılırdı.
Yunanıstanda Şirə hər şeyi qoruyan Zevsə həsr olunmuş Qartal bürcü uyğun gəlirdi. Əfsanəyə görə, o, bütün nemətlərin və bədbəxt hadisələrin baiskarı, insanların və allahların atası hesab olunurdu. Qartal öz ayında doğulanlara mərdlik, məğrurluq, ədalətlilik və hökmranlıq, hərəkətlərin nəticələrinin qiymətləndirilməsi zəruriliyini bəxş edirdi.

Fiziki strukturu

Bu adamların adətən hündür boyu, dolu mütənasib bədəni, qəşəng yumru başı olur. Enli kürəkləri, hündür, açıq alnı, azca əyilmiş burnu, dolu dodaqları var. İri, qara və ya şabalıdı gözləri, məğrur, aydın baxışları, açıq rəngdə saçları və gözəl dərisi var. Yerişi ləngdir. Xarakteri möhkəm, cəsarətli, müstəqildir. Çox diqqətli, məğrur, xeyirxah, azad düşüncəlidir. Lakin əsəbidir.

Fəaliyyət üslubu

Bu bürcdən olanlar arasında çoxlu aktyorlar, rejissorlar, prodüsserlər və teatr adminstratorları var. Şirlər xüsusilə "malı yaxşı nümayiş etdirmək" gərək olduğu yerdə daha uğurulu fəaliyyət göstərirlər. Buna görə də dizayn, aşbazlıq, vitrinlərin quruluşu və s. kimi işlər onların ürəyincədir. Qeyd etmək lazımdır ki, Şirlər yeni və təcrübələri az olan işlərə başlamağa meyllidirlər. Buna görə də çox çalışmalarına və istedadlarına baxmayaraq, bəzən öz məqsədlərinə çata bilmirlər.
Şirlər pulun özünü yox, onun yaşamağa imkan verdiyi şahanə həyatı sevirlər. Biznes onlar üçün elit bir oyundur. Belələrinin sərmayə qoya biləcəyi ən uğurlu mühit daşınmaz əmlak və əmanət sahəsidir.
Vəzifə həvəskarı olan bu Zodiak idarəetmədə peşəkardır. Çünki onda artistlik bacarığı və özünəinam hissi çox güclüdür. Zaman-zaman çətinliklərə mübtəla olsa da, vəzifə pilləsində hamını təəccübləndirməyi bacarır. Şirin ən zərif yeri olan özünəvurğunluq hissinə qarşı çıxsanız, asanlıqla onun əbədi düşməninə çevrilə bilərsiniz. Bu bürcdən olan vəzifəlilər hədsiz dərəcədə zəif yaddaşa malik olurlar. Bu amildən yararlanıb bütün işləri hiss etdirmədən icra edin və ona yalnız uğurlu nəticə haqqında məlumat verin. Şirin ürəyinə yol tapmaq istəyirsinizsə, cəsarətli və qürurlu olmağınız kifayətdir.

"Zəif" damarı

Şirlər otağa girəndə orada olanlar arxa plana keçməli, hamı onlara diqqət yetirməlidir. Unikal və digərlərindən üstün olduqlarını göstərməlidirlər. Onlara bu imkanı verin. Deyin ki, hələ bu vaxtacan belə qeyri-adi insan görməmisiniz. Onları tərifləyin, çox tərifləyin. Bu, onlara hava və su kimi lazımdır. Onları tutduqları mərkəzi mövqedən yıxmağa çalışmayın. Öz kamilliklərini nümayiş etdirməyə imkan yaradın. Həyatınızın onların ən kiçik arzularından asılı olduğunu göstərə bilsəniz, daha yaxşı olar. Deyə bilərsiniz, "bu lap ağ oldu", amma bir başqa bürclə bu, bəlkə də belə olardı. Şirlərə isə başqa yol yoxdur. Onlar bunu təbii hal kimi qəbul edir. Bu adamlar yumor hissinə malikdirlər, gülməyi xoşlayırlar, lakin özlərinə yox. İncəsənətlə, teatrla, ədəbiyyatla maraqlanırlar. Buna görə də Şirləri şəkil qalereyasının açılışına, tamaşanın, filmin premyerasına, ədəbi xarakterli dəbdəbəli yığıncağa dəvət etmək yerinə düşər.

Mənfi cəhətləri

Astrologiyadan Şirləri mərd və cəsur insan kimi tanısaq da, lakin bu adamlar eyni zamanda vəzifəpərəst, dikbaş və hissiyyatsız bir varlıqdırlar. Onlar şöhrətpərəst və lovğa olur, onların yerini tutmağa çalışan hər kəsi məhv edir, öz planlarını həyata keçirmək üçün hər şeyə (mənfi və müsbət cəhətdən) gedirlər. Qadın-Şirlər şıltaqlıq və ədabazlıq etmədən keçinə bilmirlər. Belə bir kosmik prinsip mövcuddur: "Şir, yalnız digər Şiri sevə bilər və bu digər Şir də elə onun özüdür". Ən dəhşətli Şir isə kasıb Şirdir. Belələri həmişə pafosla "Mən bacarıram, sadəcə olaraq, istəmirəm..." söyləyir.

Gizli qabiliyyətləri

Şir bürcündən olan kişiləri ifrat özünəvurğunluq və eqoizm uçuruma yuvarlada bilər. Onlar hər zaman yüksəkdə durmağa öyrəşiblər. Ona görə də belələrini yalandan tərifləməklə hər bir işə (o cümlədən yaramaz işlərə də) sövq etmək mümkündür. Bu sayaq insanlar bir anlıq parlamaq üçün çox şeyi qurban verərlər.
Aşağı səviyyəli Şirlər eqoistdir. Belələri tərəddüd etmədən ailəsini, uşaqlarını onlara məftun olduğunu göstərə bilən başqa bir qadından ötrü ata bilərlər. Onlar hətta ailələrinin çörəkpulunu düşünmədən sağa-sola xərcləməyə qadirdirlər. Özlərini təmizə çıxarmaq üçün gözlərini qırpmadan yalan danışa bilərlər. Şan-şöhrətə çox qısqancdırlar. Onların səhvlərini üzə çıxaranlara nifrət bəsləyirlər. Əgər yüksək səviyyəli Şirlər alicənab və müdrik padşahlardırsa, aşağı səviyyəli Şirlər tovuz quşu lələyi taxmış qarğalardır və onlar bu lələyi hər şeydən üstün tuturlar.
Şir bürcündən olan qadınlar isə hər bir halda şahzadədirlər. Onların aşağı səviyyəli olanları çox bədxərc və eqoistdirlər. Belələrinin istəyi başqaları üçün qanundur. Əgər kimsə onların istəklərini yerinə yetirmirsə, ona nifrətlə baxırlar. Bu sayaq qadınlar digər həmcinslərinə yalnız xidmətçi, yaxud da özlərinə maneə kimi baxırlar. Zərif məxluqa aid Şirlər heç fərqlərinə varmadan kasıblıq içində yaşayan rəfiqələrinə bahalı plastik əməliyyat keçirməyi məsləhət görərlər, həmçinin hansısa pərəstişkarını bir aylıq maaşını onlarla restoranda xərcləməyə sövq edə bilərlər.
Aşağı səviyyəli Şir-qadınlar, yüksək səviyyəli Şir-qadınlardan qorxurlar. Çünki onların üstünlüyünü çox yaxşı duyurlar. İşlənməmiş karmaya malik olan belə qadınları gözləyən real təhlükələrsə göz qabağındadır. Parlaq (yəni pullu) cəmiyyətdə dolanmağa öyrəşən Şir-qadınlar təbii ki, tez-tez borca da düşərlər. Bununla da kriminal ünsürlərin "razborka"sının qurbanı çevrilə bilərlər.

Karmik düyünü

Bu bürcdən olanlar üçün daimi dəyişən enerji axını xarakterikdir. Şir ideal rəhbərdir. O, ruhlandırmaq lazım gələni, öz enerjisi ilə ruhlandırır, digərlərini isə təkararolunmaz avtoriteti ilə tabe edir. Onun əsas problemi aşağı səviyyədə qavramadadır. Ona elə gəlir ki, uğur qazanan və güclü olan haqlıdır. Bundan başqa Şir reallığın ancaq onun enerjisinin işıqlandırdığı tərəfi ilə maraqlanır. Qalan şeyləri isə inkar edir.
Ali Şir öz enerjisi ilə kor olmuş vəziyyətdə deyil. O, impulsiv deyil və həyatı diqqətlə müşahidə edir. Ali Şir enerji axınının da qulu deyil. Bu adam enerjini idarə etməyi bacarır. Bu, bir növ incəsənətdir. Odur ki, Şir həmişə nəzərə almalıdır ki, enerji özlüyündə heç nə yaratmır, bu enerjini yalnız lazımi istiqamətə yönəldib idarə ediləndə nəsə bir nəticə verir. Həmçinin Şir onun idarəçiliyi altında olmayan real həyata hörmət etməyi öyrənməlidir. O, özünü daha çox həyatın gözəlliyinə sevinmək mümkün olduğu və başqalarına sevinc bəxş edən yaradıcı və aktyor kimi çıxış etməyin mümkün olduğu yerdə ifadə edə bilər.

Yuxuları

Bu adamların yuxularla bağlı tez-tez çətinlikləri olur. Profilaktika kimi onlara məsləhət görərdik ki, yatmazdan qabaq bədənlərini masaj etsinlər və nəfəs gimnastikası ilə məşğul olsunlar. Bu bürcün nümayəndələri yuxuları nadir hallarda yadda saxlayır, lakin yadda qalanları hər hansı problemi həll etməkdə onlara kömək edir, həmçinin gələcəkdən, sirli aspektlərdən xəbər verir. Bəzən Şirlərdə öncəgörmə qabiliyyəti də özünü büruzə verir. Bu, ondan irəli gəlir ki, onların dərrakəsi Qoçlarda olduğu kimi çox itidir və hər bir cüzi informasiyanı da "qamarlayırlar". Şirlərin gördükləri yuxular çox ciddi olur. Onlar özlərinin bu istedadlarını lazımınca qiymətləndirməyi bacarmalıdırlar. Bəzən də olur ki, bu şəxslər "boş-boş" yuxular görürlər. Bununsa özünəməxsus mənaları var. Lakin Şirlər energetik planda çox güclü insanlar olduğundan öz enerjilərilə istənilən bədxah adamı ciddi surətdə zədələyə bilərlər. Buna görə də, yaxşı olar ki, Şirlər öz yuxularını diqqətlə izləsinlər və qəfil hərəkətlərdən qorunmaq üçün özlərini idarə etməyi bacarsınlar.

Sevgisi

Şirlər məhəbbətdə romantikdirlər. Sevdiyi adamla dağ başında, dəniz sahilində, təbiətin füsunkar qoynunda görüşlərə çıxmağa can atırlar. Şirlər güllərlə, hədiyyələrlə dolu təmtəraqlı həyatı və nümayiş olunmağı sevirlər. Övladlarını çox sevir, həmişə onlara işdən daha çox vaxt ayırmağa çalışırlar, amma bu, demək olar ki, mümkün olmur.


Flora dünyası

Şirlər torpaqda çox işləməyi xoşlayır, buna görə də hazır, dərilmiş çiçəkləri, ələlxüsus da pion, qladiolus, xrizantem güllərini bəyənirlər. Şirlərə zövq verən çiçəklər sırasına lalə, gülünbahar, peyğəmbərçiçəyi və kalendulanı da əlavə etmək olar. Onların ekzotik bitkilərə rəğbət bəslədiyini nəzərə alaraq deyə bilərik ki, bu adamlar evdə kiçik bir ağac da becərə bilərlər. Bu kiçik ağac palma olsa, lap yerinə düşər. Çünki palma ağacı onlara çox yaxşı təsir göstərir.
Şirlərin sevdikləri ətirlər: ənbər, qızılgül, inciçiçəyi, paçuli, jasmin, kokos...

Fauna dünyası

Klassik astrologiyada hər bir Zodiak işarəsinin müxtəlif heyvanlarla bağlılığı haqqında dəyərli fikirlər göstərilib. Özü də bu bağlılıq həm analoji, həm də xarakterik cizgilərlə qeyd olunub. Bu baxımdan Şir bürcünə düşən heyvanlar bunlardır: şir, bəbir, qartal, xoruz, şahin və s.

Xəstəlikləri

Əvvəlcə bildirək ki, Şir bürcünün himayədarı olan Günəş insanlara həyat enerjisi bəxş edir, bütün orqanlarda xoş əhval yaradır. Bu parlaq planet qan dövranına, həzm sisteminə də müsbət təsir edir. Astroloqlar Günəşin - Şir bürcünün hakim olduğu dövrdə (23 iyul-22 avqust) əsəb gərginliyi və göz ağrılarının şiddətləndiyini göstərirlər. Barəsində danışdığımız bürcdə diafraqma, ürək, onurğa sütunu belə qədər (yuxarıdan) bel əzələləri, tor qişa kimi fəsadlar olur. Şir bürcü ilə hipotaniya, stenokardiya, aortanın anevrizmi və başqa ürək xəstəlikləri, bel beyinin soyuqlaması xəstəlikləri əlaqəlidir.

Ölüm ünvanları

Müşahidələrdən bəlli olur ki, enerji simvolu olan Şirlər daha çox saraylarda, ictimai yerlərdə - mitinq və toplantılarda, bir sözlə, adamlar çox olan yerlərdə ölürlər. Aldıqları və ölümlərinə səbəb ola biləcək xəsarətlər isə bunlar olur: infeksion xəstəliklər, edam, müharibədə yaralanma, yanıq, ürək dayanması və s.

Məşhur "şirlər": Həzrəti Əli (ə), Xan Şuşinski, Niyazi, Mustafa Topçubaşov, Cəmşid Naxçıvanski, Şıxəli Qurbanov, Məmmədrza Şeyxzamanov, Əhsən Dadaşov, Xudu Məmmədov, Mirvarid Dilbazi, Aydın Qaradağlı, Seyfəddin Dağlı, Maral Rəhmanzadə, Flora Kərimova, İlhamə Quliyeva, Afaq Bəşirqızı, Müslüm Maqomayev (nəvə), Rafiq Hüseynov (diktor), Mehriban Ələkbərzadə, Bəxtiyar Vahabzadə, Şahmar Ələkbərov, Rasim Balayev, Etibar Elkin, Anatoli Banişevski, Toğrul Nərimanbəyov, Rəfiqə Axundova, Akif İslamzadə, Pənah Hüseyn, Əlisa Nicat, Rəfael Hüseynov, Azər Paşa Nemətov, Kamal Talıbzadə, Alim Qasımov, Kamil Vəli Nərimanoğlu, Vasif Adıgözəlov və b.

Səbuhi RƏHİMLİ