“Bələdiyyələrin sayı kifayət qədər azalacaq” - Yenilənib

belediyyelerin-sayi-kifayet-qeder-azalacaq
Oxunma sayı: 2384

Bələdiyyələrin birgə fəaliyyəti, birləşməsi, ayrılması və ləğv edilməsi haqqında” qanuna təklif edilən dəyişikliklə bələdiyyə sayı təxminən 2/3 qədər azalacaq”. 

“Qafqazinfo” xəbər verir ki, bu fikirləri Milli Məclisin Regional məsələlər komitəsinin sədri Siyavuş Novruzov bildirib. 

Komitə sədri qeyd edib ki, bu azalma kifayət qədər olacaq: “Misal olaraq, Xınalıq, Lahıc, Laza kəndləri. Bu cür kəndlərdə özlərinin xüsusiyyətləri, iqtisadiyyatları və s. formalaşıb. Qalan hallarda bələdiyyələr birləşəcək. Bələdiyyələr var ki, suyu var, torpağı yoxdur. Yaxud örüş yeri var, torpaq sahəsi yoxdur.

Bundan başqa, 5 kənd var ki, cəmi bir qəbiristanlığı var. Odur ki, belə kəndlərin bələdiyyələri birləşdirilərək vahid model yaranacaq. Nəticədə həm bələdiyyələrin maliyyəsi artacaq, həm torpaq sahələri genişləndiriləcək, həm də mövcud problemləri həllini tapacaq”.

***

Digər deputat Kamran Bayramov əlavə edib ki, gələcəkdə də bələdiyyələrin birləşməsi prosesi davam edəcək: “Bu, bir çox dövlətlərdə tətbiq olunur”.

O qeyd edib ki, bu, Azərbaycan üçün də yeni təcrübə deyil: “Sayca 3-cü birləşmə prosesi gedir. Budəfəki birləşmə prosesi mexanizminə görə fərqlənir”.

***

Deputat Tahir Rzayev qeyd edib ki, bələdiyyələrin birləşməsi çox vacibdir: “Bildirildi ki, bələdiyyələrin birləşməsindən sonra 700-ü qalacaq. Hesab edirəm ki, 700 bələdiyyə də çoxdur. Çünki əhalisi bizimlə eyni sayda olan ölkələr var ki, orada 200 və ya ondan bir az artıq bələdiyyə fəaliyyət göstərir”.

Zaur Mirzə