Gürcüstan yeni məhdudiyyətlər tətbiq edəcək

gurcustan-yeni-mehdudiyyetler-tetbiq-edecek
Oxunma sayı: 1888

Gürcüstan hakimiyyəti ölkədə pisləşən epidemioloji vəziyyətə görə məhdudiyyətləri genişləndirməyə və sərtləşdirməyə qərar verib.

“Qafqazinfo” “Sputnik Gürcüstan”a istinadən xəbər verir ki, Koronavirusla mübarizə üzrə Koordinasiya Şurası ölkədə koronavirusun sürətlə yayılması səbəbindən 28 noyabrdan etibarən ölkə daxilində yeni məhdudiyyətlərin tətbiq ediləcəyini açıqlayıb.

Xüsusilə restoran, ictimai nəqliyyat vasitələri, ticarət mərkəzləri, marketlər və fitness klublarının faəliyyətini dayandıracağı bildirilib. Bununla yanaşı yeni qərara görə, saat 21:00-dan 05:00-dək insanların və nəqliyyat vasitələrinin hərəkəti tamamilə qadağan ediləcək.

Qanun pozuntusuna görə cəza iki min laridir. Yeni tənzimləmə 28 noyabrda qüvvəyə minəcək və 31 yanvara qədər qüvvədə qalacaq.

Ölkədə artıq bir sıra məhdudiyyətlər qüvvədədir: qapalı məkan, nəqliyyat və küçələrdə maska taxmaq məcburidir, böyük şəhərlərdə məktəblər distant təhsil rejiminə keçib, uşaq bağçaları isə fəaliyyətini dayandırıb.

Gürcüstanda ikinci bir koronavirus dalğası müşahidə olunur. Hər gün üç mindən çox yeni yoluxma qeydə alınır. Pandemiyanın başlanmasından 26 noyabr tarixinə qədər Gürcüstanda təsdiqlənmiş “COVID-19” hadisələrinin ümumi sayı 118 min nəfəri keçib, 1100-dən çox insan xəstəlik səbəbindən həyatını itirib.