ABŞ Prezidenti Donald Tramp çərşənbə axşamı günü Oval Ofisdə Almaniya Kansleri Fridrix Mertslə görüşərkən boynunda əvvəlki gün diqqət çəkən qızartıları örtmək üçün makiyaj tətbiq edib.

“Qafqazinfo” xəbər verir ki, bu barədə “The Independent” yazır.

Bildirilir ki, bir gün əvvəl Trampın boynunun sağ tərəfində, qulaqdan başının arxasına qədər yayılan parlaq qırmızılıq fotoşəkillərdə diqqət çəkmişdi. Çərşənbə axşamı çəkilən fotolarda isə dərisi təmiz görünür, lakin narıncı çalarlar sezilirdi.

Ağ Evin həkimi Dr. Sin Barbabella “The Independent” qəzetinə bildirib ki, Tramp boynuna profilaktik dəri kremi tətbiq edir. Həkim kremin nəyi müalicə etdiyini açıqlamayıb, yalnız prezidentin bir həftə ərzində bu müalicəni davam etdirəcəyini qeyd edib.

Trampın dərisindəki rəng dəyişikliyinin səbəbi barədə mütəxəssislər müxtəlif fərziyyələr irəli sürüblər. “MSNow” tibb analitiki Dr. Vin Qupta qızartının xərçəngönü ola biləcəyini qeyd edib və Ağ Evin dərinin vəziyyəti barədə məlumatı gizli saxlamasını tənqid edib. Bununla bağlı Ağ Evin mətbuat katibi Kerolayn Livitt spekulyasiyaları qınayaraq, siyasi məqsədlər üçün sağlamlıq mövzusunda yalan məlumat yayılmasının etik olmadığını bildirib.

Trampın makiyaj tətbiqi onun fiziki sağlamlığı və zehni kəskinliyi ilə bağlı müzakirələrin olduğu bir vaxtda baş verir. Prezident keçmişdə də əlindəki göyərmələri örtmək üçün makiyajdan istifadə edib. Ağ Ev rəsmiləri göyərmələri “tez-tez əl sıxmaq” hərəkətinə bağlayaraq, narahatlıqları azaltmağa çalışıblar. Lakin Tramp yanvar ayında “The Wall Street Journal”a açıqlamasında göyərmələrin həkimlərin tövsiyə etdiyi dozadan yüksək aspirin istifadəsindən qaynaqlandığını bildirib.