Mahirdən o foto barədə - Açıqlama

Mahirdən o foto barədə
Oxunma sayı: 3803

“İnsan jurnalist də, futbolçu da, biznesmen də ola bilər. Sonda insan olmaq lazımdır”.

“Qafqazinfo” xəbər verir ki, bunu İctimai TV-nin efirində yayımlanan “Bol İdman” verilişində Polşa “Legiya”sında çıxış edən millimizin hücumçusu Mahir Emreli deyib.

“Bir insanın nə qədər pis qəlbi olmalıdır ki, o şəkli 3-4 ay saxlasın, sonra yaysın. O şəkil 3-4 ayın şəkli idi. Biz “Slaviya” ilə ilk oyunu oynamışdıq.

Baş məşqçi bizə 2-3 gün istirahət vermişdi. Bu fotonu nə “Slaviya”dan öncə, nə də sonra heç kim paylaşmadı. Amma niyəsə uğursuzluq olan kimi, bu xəbərlər ortaya çıxmağa başladı.

Niyə mən “Slaviya”ya iki qol vurduğum oyundan sonra bu şəkil çıxmamışdı ki, Mahir gecə klubunda əylənir? Məqsəd nə idi burda? Mənə gülməli gəldi”, - Mahir bildirib.

Mahir həmin hadisə ilə bağlı verdiyi açıqlamanın azarkeşlərin xoşuna gəlmədiyini deyib:

“Bir ifadə oldu ki, mən demişəm müsəlmanam, alkoqol istifadə etmirəm. Açığı, mən belə bir ifadə işlətməmişəm. Müsəlmanam, içmirəm deyə bir şey yoxdur. Guya içən müsəlmanlar yoxdur? Bu bəzi azarkeşləri mənə qarşı qəzəbləndirdi”.

Qeyd edək ki, Mahir Emrelinin spirtli içki ilə görüntüləri yayımlanmışdı. Fotonu Arek adlı azarkeş Tvitter hesabında paylaşmışdı. Bildirilmişdi ki, Emreli komanda yoldaşı Abu Hanna ilə birlikdə gecə klubunda olub və foto avqust ayında çəkilib.