“Düzdür, maaş almırıq”

duzdur-maas-almiriq-
Oxunma sayı: 1231

Topaz Premyer Liqasının 20-ci turu çərçivəsində “Neftçi” evdə “Rəvan”ı qəbul edib.

1:1 hesabı ilə yekunlaşan görüşdən sonra qonaqların müdafiəçisi Novruz Məmmədov jurnalistlərə müsahibə verib. “Qafqazinfo” həmin müsahibəni təqdim edir:

- Çətin oyun oldu, matça ciddi hazırlaşmışdıq. Turnir cədvəlinə nəzər salsaq, görərik ki, vəziyyətimiz elə də yaxşı deyil. Xallarımız silinəndən sonra daha da pis vəziyyətdə qaldıq. Əlimizdən gələni edirik ki, bacardığımız qədər xal toplayaq.

- Ötən tur “Xəzər Lənkəran”a qarşı oynamısınız. Rəqibin gücünü az-çox gördün. Səncə, bu komandanı arxada qoya biləcəksiniz?

- Bizim də ilk növbədə fikrimiz budur. Hər oyun mübarizə aparıb xal toplamaq istəyirik ki, onları arxada qoyaq.

- Matçdan əvvəl “Neftçi” səfərindən 1 xalla dönməyə razı idinizmi?

- Son matçlarda qolları son dəqiqələrdə buraxırıq. 1 xalı fikirləşsək, bəlkə də uduzarıq. Ona görə də qələbəni düşünürük ki, azı heç-heçə edək.

- Oyunboyu əsəbi görünürdün. Hətta epizodların birində komanda yoldaşını da təhqir etdin. Nə baş vermişdi?

- Düzdü, əsəbləşmişdim, amma təhqir etmədim. Sonra üzr istəmişəm. Ola bilər də, oyun ərzində əsəbləşirsən. O da məni söyüb, ola bilər eşidilməyib.

- Bu gün belə bir məlumat yayıldı ki, maliyyə problemlərinə görə “Neftçi” ilə görüşdən sonra digər qarşılaşmalara çıxmayacaqsınız...

- Bu haqda fikirləşmirik. Hazırda məqsədimiz başqadır. Düzdür, maaş almırıq, ancaq avans verilir. Bundan sonra nə olacağını zaman göstərəcək.

- Bu gün maaşlarınız verilməli idi...

- Oyun gününə düşdü deyə, ola bilər, başları qarışıq oldu. Sabahı gözləyirik.

- Maaşlar veriilməsə, “Rəvan” mövsümü başa vuracaq?

- Bunu etməliyik. Qarşıda hələ neçə tur var. Meydana çıxıb, oynamasaq, özümüzə ziyan vurmuş olarıq.

- Ötən il “Simurq” futbolçuları maaşlarını ala bilmədiyinə görə, meydançada oturaq aksiya keçirimişdi. Bıçaq sümüyə dirənəndə sizdən də bu cür bir aksiya gözləmək olarmı?

- Aksiya başqa, oynamamaq başqa məsələdir. O qədər də dərinliyə düşməyək. Bəlkə də sabah gətirib pulumuzu verdilər.