“Əslində” – Günün şeiri
Əslində əslində əslində deyil,
Əsli də heç də bir mislində deyil.
O, miskin, sərgərdan, dünya-xəzinə,
Açarı sehirli "sim-sim"də deyil.
Bu yerdə yaşamaq sadə bir işdir,
Burda hər nə varsa tilsimdə deyil.
Yalanla doğrunun arasındadır,
Yalana doğruya təslim də deyil.
Yarısı qaranlıq, yarısı işıq
Tam kafər, tam bütöv müslim də deyil.
Əsli var, kökü yox, - əsilzadədir,
Bu halın günahı nəslində deyil.
Üzü gün, qəlbi buz, ikili sifət,
Gül açıb, amma gül fəslində deyil.
Hüseyn də dəyişib, Söyün olubdu,
Gülsüm də əvvəlki Gülsüm də deyil.
Bu günün adamı kimi - adamdı,
Dindir gör, heç o da əslində deyil.
