Heydər Əsədov kollegiya iclası keçirdi

Heydər Əsədov kollegiya iclası keçirdi
Oxunma sayı: 1288

Kənd təsərrüfatı naziri Heydər Əsədovun iştirakı ilə Nazirliyin struktur bölmələrinin, Rayon Kənd Təsərrüfatı İdarələrinin və tabeliyindəki qurumların rəhbərlərinin iştirakı ilə geniş kollegiya iclası keçirilib. 

"Qafqazinfo" xəbər verir ki, iclasda çıxış edən H. Əsədov qeyd edib ki, keçən il ölkəyə 10 mindən çox texnika gətirilib. Aqrar sahənin texniki təminatının yüksəldilməsi üçün müvafiq tədbirlər görülüb və bu il də kifayət qədər vəsait ayrılıb. 2016-cı ildə ölkəyə 1,6 milyon, keçən il isə təxminən 1,2 milyon ton taxıl idxal olunub. Taxıl idxalı üçün təxminən 227 milyon vəsait xərclənir. Bu, böyük rəqəmdir.

Nazir bildirib ki, pambıqyığan kombaynların alınması üçün də müqavilə bağlanıb və 100 ədəd kombayn gətiriləcək: "Keçən il pambıq yığımına çatmayan 69 kombayn da ölkəyə gətirilib. Əkinə gəldikdə isə, bu il təxminən 140 min hektarda pambıq əkini planlaşdırılır. Gəncə Avtomobil Zavodu ilə də əməkdaşlıq həyata keçirilir. Artıq 1000-dən çox traktorun alınması ilə bağlı zavodla müqavilə bağlanıb. Həmin traktorlar üçün 2000-dən çox texnika, o cümlədən 700 ədəd qoşqunun sifariş verilməsi isə on gün ərzində təmin olunmalıdır. Beləliklə, pambıq istehsalının təşkili üçün mütəşəkkil iş başlanmalıdır".

Güzəştli şərtlərlə satılan gübrənin həcminin artırılacağını deyən nazir qeyd edib ki, hazırda 100 manat dəyərində gübrə güzəştlə satılırdısa, bu 150 manatadək artırılacaq. Şəkər çuğunduru əkininə xüsusi önəm verilib. 2017-ci ildə düyünün alınmasına 36 milyon dollar vəsait xərclənib. Baramaçılıq sahəsinə diqqət artırıldı və keçən il 245 ton barama əldə edildi. Bu il isə 400 ton barama istehsalı planlaşdırılır.

Nazir bu il Çin Xalq Respublikasından 11 min qutu İpəkqurdu toxumu (qrena) gətirilərək ödənişsiz əsaslarla sahibkarlara veriləcəyini bildirib.

H. Əsədov bildirib ki, ötən il sitrus meyvələrinin idxalına 16,9 milyon dollar vəsait xərclənib.  Keçən il kərə yağının alınmasına 67 milyon, pendirə 20 milyondan çox valyuta xərclənib. Halbuki heyvandarlıqda işi düzgün təşkil etsək, həm valyuta ölkədə qalar, həm də məşğulluq artar. Ötən il süni mayalanma yolu ilə 52 min baş damazlıq buzov alınıb.

Sonra Hüquq, kadr və yerli orqanlarla iş şöbəsinin müdiri Xudayət Həsənli, Azərbaycan Dövlət Aqrar Universitetin rektoru İbrahim Cəfərov, Bitkiçilik şöbəsinin müdiri İmran Cümşüdov və digərləri çıxış edərək, aqrar sahənin kadr potensialından, ixtisaslı kadrların yetişdirilməsindən, Aqrar Universitetdə tələbələr üçün yaradılan şəraitdən, təhsilin səviyyəsinin yüksəldilməsindən, bitkiçilikdə, eləcə də baramaçılıqda əldə olunan nailiyyətlərdən və qarşıda duran vəzifələrdən danışıb, problemlərin həlli yollarından bəhs ediblər.

Yekunda H. Əsədov “Aqrolizinq” ASC-nin regional nümayəndəliklərinin və rayon bölmələrinin fəaliyyət mexanizminin təkmilləşdirilməsi, qarşıdan gələn taxıl yığımı kampaniyasının mütəşəkkil keçirilməsi məqsədi ilə taxılyığan kombaynların dislokasiya planının hazırlanması, pambığın becərilməsində aqrotexniki tədbirlərin vaxtında yerinə yetirilməsi və bu sahədə işlərin səmərəliliyinin artırılmasını məqsədəuyğun hesab edib. Heydər Əsədov rayonlarda aidiyyəti struktur bölmələrinin koordinasiyasının gücləndirilməsi, fəaliyyətlərində operativliyin təmin olunması və qarşıda duran vəzifələr barədə rayon kənd təsərrüfatı idarələrinin rəhbərlərinə müvafiq tapşırıqlar verib.

Nazir eyni zamanda heyvandarlığın və taxılçılığın inkişafı ilə bağlı qısa müddətdə Dövlət Proqramının hazırlanaraq təqdim olunması üçün Nazirliyin müvafiq şöbələrə tapşırıqlar verib. O cümlədən müasir texnikaların idarə olunması məqsədilə mexanizatorlar üçün qısa müddətli sürücülük kurslarının təşkil olunması, alınmış gübrə və pestisidlərdən düzgün və səmərəli istifadə olunması, süni mayalama mütəxəsislərinin treninqlərə göndərilməsi, təbliğat təşviqat işlərinin gücləndirilməsi, institutlarda ting və tərəvəz toxumunun istehsalı, Elektron Kənd Təsərrüfatı İnformasiya Sisteminin məlumat bazasının təkmilləşdirilməsi barədə tapşırıq və tövsiyələr verilib.





Daha tez məlumatlanmaq üçün yeni Facebook səhifəmizi