“Vaxtilə İlqar Məmmədovun şəkli ilə küçələrə çıxırdılar, indi isə...”

“Vaxtilə İlqar Məmmədovun şəkli ilə küçələrə çıxırdılar, indi isə...”
Oxunma sayı: 5921

Yeni Azərbaycan Partiyasının İcra katibinin müavini, Milli Məclisin deputatı Siyavuş Novruzov da prezidentin martın 16-da imzaladığı əfv sərəncamına münasibət bildirib. Bu barədə “Qafqazinfo”ya danışan S. Novruzov qeyd edib ki, cənab prezidentin sərəncamı ilə 431 nəfər əfv edilib:

“Onların hər biri prezidentin humanizm siyasətinin nəticəsində azadlıq əldə edib. Ona görə də əfv edilənlərin heç birini bir-birindən ayırmıram. Onlar bu və ya digər şəkildə törətdiyi cinayətə görə cinayət məsuliyyətinə cəlb olunmuşdu. Bu günə verilən əfv sərəncamları nəticəsində 30 mindən yuxarı insan azadlığa çıxıb. Həmçinin Milli Məclis tərəfindən amnistiya aktı qəbul edilib. Birinci vitse-prezident Mehriban Əliyeva o zaman deputat kimi amnistiya aktı təşəbbüsüylə çıxış etdi. Bu akt da 10 mindən artıq insana şamil olundu. 

Sonuncu əfv sərəncamı ilə də 400-ə yaxın insan birbaşa cəzaçəkmə müəssisələrindən azad olundu. Bir qrup insan barəsində başlanan cinayət işinə xitam verildi. Bir qrup məhbus isə şərti cəzasından azad olundu. Bu çox böyük, humanist addımdır. Bu sərəncama istər Avropa, istərsə də dünyanın aparıcı təşkilatları öz dəstəyini verib. Ona görə də bir neçə adamın fərdi qaydada dediklərinə münasibət bildirməyəcəm. Münasibəti cənab prezidentin fərmanına bildirə bilərik. O, humanist və cəsarətli addım atdı. Bütün dünyaya sübut etdi ki, Azərbaycan müstəqil dövlətdir. 

İndi kimsə bəyan edir ki, filan ölkə təsir edib. Filan ölkə səni hardan tanıyır?! Qəti şəkildə belə bir şey yoxdur.  Azərbaycan hüquqi dövlətdir. Onun ərazisində öz qanunları tətbiq olunur. Verilən qərarlar da, atılan addımlar da Konstitusiya ilə verilmiş hüquq əsasında atılır. Bu hüquqlar da Azərbaycan prezidentinə məxsusdur”.

S. Novruzovun sözlərinə görə, bir qrup şəxs  var ki, onlar məhbusların adlarından istifadə edirlər. Özlərini müxalifətin əsas aparıcı qüvvəsi adlandırırlar. Halbuki  onların ətrafında heç bir sosial elektorat yoxdur. Vaxtilə Milli Şura üzvləri İlqar Məmmədovun şəklini boyunlarından asıb küçələrə  çıxırdılar və ona azadlıq tələb edirdilər. Amma azadlığa çıxandan sonra onlar arasında gedən mübarizənin, qırğının hamı şahididir. Bu istər sosial şəbəkələrdə, istərsə də birbaşa baş verir. İndi o cür insanlar bu və ya digər şəkildə törətdiyi cinayət əməlinə görə məsuliyyətə cəlb olunublar. Onların adlarını siyasiləşdirməklə digərlərinin yollarını bağlamaq istəyirlər. 431 nəfər  azadlığa çıxdı. Bunlar digər 431 nəfərin yolunu bağlamaq istəyirlər və sui-istifadə edirlər ki, AXCP-Milli Şuranın qrant almasına başqasını şərik etməsinlər”. 

Deputat həmçinin sabiq səhiyyə naziri Əli İnsanovun əfv edildikdən sonra söylədiyi fikirlərə də münasibət bildirib.

“Arxivi açın baxın ki, Əli İnsanov müxlaifət liderləri haqqında hansı fikirləri söyləyib? Bütün arxivlərdə sənədlər var.  Ona görə də, mən çox geniş bu məsələyə toxunmuram. Həyat göstərəcək ki, 1-2 aydan sonra bunların arasındakı münasibət hansı səviyyədə olacaq”-deyə qeyd edib. 

 S. Novruzov Meydan TV-nin rəhbəri Emin Millinin prezidentin əfv sərəncamını təqdir etməsi ilə bağlı yaydığı bəyanatdan da danışıb.

O,vurğulayıb ki, hər bir insan özündə  düzgün qiymətləndirmə tapıb bu məsələlər münasibət bildirirsə bu, yaxşı haldır: “Emin Millinin yazılarını oxudum. O da qeyd edir ki, bu, prezident tərəfindən atılan cəsarətli addımdır. Prezident bir daha  sübut etdi ki, onların kiməsə təsirinə edəcəyindən, ətraflarında hansısa kütlələrin yığışacağından söhbət gedə bilməz: “Bu gün Azərbaycan xalqı prezidentin ətrafındadır. Xalq-iqtidar birliyi var. Bunun da bariz nümunəsi keçən ilin aprel ayında olub. 

Kimsə demir ki, o azadlığa çıxıb xarüqələr yaradacaq? Getsin yaratsın.  Axı insanlar bu adamların hamısını tanıyır.  Tarixi sözlə saxtalaşdırmaq olmaz. Tarix insanların gözü qarşısındadır. Bir gün bir söz deyib sabah başqa söz demək Azərbaycan cəmiyyətində qəbul olunmur. İnsan bir əqidəyə, bir yola, bir istiqamətə qulluq etməlidir”.

Günel Türksoy


Daha tez məlumatlanmaq üçün yeni Facebook səhifəmizi