Dünən Nəsimi Rayon Polis İdarəsinin rəisi Musa Musayevin onu idarədə təhqir etməsindən şikayətçi olan "Əli və Nino" kitab evinin sahibi Nigar Köçərli ölkə prezidentinə müraciət edib.

"Qafqazinfo" xəbər verir ki, müraciətin mətnini sosial şəbəkədə paylaşan N.Köçərli təhlükədə olması ilə bağlı narahatlığını ifadə edib və dövlət başçısından bu işi şəxsi nəzarətinə götürməsini xahiş edib:

"DİN-in açıqlamasından sonra ailəmin və özümün qorxduğumu gizlətməyəcəyəm. Bu gecə atam və qardaşım təhlükəsizliyim üçün qorxduqlarından mənimlə birlikdə idilər. Bir çoxları mənə ölkədən getməyi məsləhət görür. Lakin mən bu barədə düşünmək istəmirəm - qoy, cinayəti törədənlər getsinlər.

Mən ziyalı ailəsində böyümüşəm, uşaqlıqdan qayğı və sevgiylə əhatə olunmuşam, təhsil və xeyirxahlığın gücünə inanaraq böyümüşəm. Həmişə məni ağıllı, xeyirxah, nəcib insanlar əhatə ediblər. Sahibkarlıqla məşğul olduğum illər ərzində mən qanunun gücünə ürəkdən inanaraq möhkəm olmağı öyrənmişəm. Dünənki hadisə isə mənim üçün tamamilə şok oldu.

Mən daxili işlər naziri Ramil Usubova müraciət edirəm!
Mən Nəsimi Rayon Polis İdarəsinə heç kimin müşayiəti olmadan getmişəm. Çünki Prezidentə şikayət etməyimin cavabında təhqir və təhdid olunacağım, daha sonra DİN-nin bəyanatında İdarə rəhbərliyinə hücum etməkdə günahlandırılacağım ağlıma belə gəlməmişdi. Mən əminəm ki, idarə rəisinin kabinetində videoçəkiliş həyata keçirilib. Xahiş edirəm, onunla tanış olun, sonra isə onu hamı üçün əlçatan edin. Mən bu məsələdə təkid edirəm.

Mən dövlət başçısı İlham Əliyevə müraciət edirəm!
Sahibkarlıq fəaliyyətim ərzində mən dəfələrlə məmur özbaşınalığı ilə qarşılaşmışam və sizə kömək üçün müraciət etmişəm (president.az saytı vasitəsilə). Hər dəfə bir qayda olaraq haqq-ədalət öz yerini tapıb. Siz ölkə məmurlarına sahibkarlara kömək etmək və dəstəkləmək tələbi ilə müraciət etdiyiniz bir zamanda mənim sizə şikayətim böhtana məruz qalmağıma səbəb olur. DİN-in ünvanıma böhtan dolu bəyanatı ilə tanış olduqdan sonra, başa düşdüm ki, istənilən an mənə qarşı qanunsuz əməllər həyata keçirilə bilər. Mən təhlükədə olduğumu hiss edirəm. Xahiş edirəm ki, bu işi şəxsi nəzarətinizdə saxlayasınız."