Ukrayna Prezidenti Volodimir Zelenski Böyük Britaniyaya səfəri çərçivəsində Londonda parlamentdə çıxışı zamanı döyüş meydanını real vaxt rejimində izləməyə imkan verən xüsusi sistemlə işləyən “iPad” təqdim edib və cihazlardan birini Kral III Çarlza hədiyyə edib.

“Qafqazinfo” xəbər verir ki, Zelenski bu addımı Ukrayna ilə Böyük Britaniya arasında müdafiə əməkdaşlığının simvolik göstəricisi kimi qiymətləndirib.

Onun sözlərinə görə, təqdim edilən sistem müasir təhlükəsizliyin köhnə müdafiə modellərindən daha sürətli, daha çevik və daha sərfəli olduğunu nümayiş etdirir.

Prezident bildirib ki, özü ilə yanaşı, hökumət üzvləri, hərbi komandirlər və müdafiə naziri də eyni “iPad”lər vasitəsilə cəbhədəki vəziyyəti izləyirlər. Sistem real vaxtda döyüş meydanının xəritəsini, enerji infrastrukturu ilə bağlı məlumatları və hətta düşmən itkilərini video sübutlarla yoxlamağa imkan verir.

Zelenski çıxışında Ukraynanın müasir müharibə yanaşmasına da toxunub. O qeyd edib ki, hazırda Rusiya qüvvələrinin itkilərinin təxminən 90 faizi dronların payına düşür. Bundan əlavə, Ukraynanın hava hücumundan müdafiə sistemlərinin effektivliyi təxminən 87 faiz təşkil edir.

Prezident 14 mart tarixində baş vermiş genişmiqyaslı hücumu da misal çəkib. Onun sözlərinə görə, həmin gün Rusiya tərəfindən 430 dron və 68 raket buraxılıb və bütün proses Ukrayna qüvvələri tərəfindən “iPad” üzərindən real vaxtda izlənilib.

“İnsanları birbaşa təhlükəyə atmaq əvəzinə, belə texnologiyalardan istifadə etməliyik”, – deyə Zelenski britaniyalı qanunvericilər qarşısında bildirib. O əlavə edib ki, bu sistem buraxılış nöqtələrini, uçuş trayektoriyalarını, ehtimal olunan hədəfləri və Ukraynanın cavab tədbirlərini ümumi şəkildə izləməyə imkan yaradır.

Zelenski həmçinin vurğulayıb ki, Ukraynanın müharibə dövründə inkişaf etdirdiyi bu cür texnologiyalar gələcəkdə dron və raket təhdidləri ilə üzləşən müttəfiq ölkələrlə də paylaşıla bilər.

Görüş zamanı maraqlı an da yaşanıb. Kral III Çarlz hədiyyə edilən “iPad”ə maraq göstərərək daha bir cihazın olub-olmadığını soruşub. Zelenski isə yalnız şəxsi “iPad”inin qaldığını bildirib. Buna cavab olaraq kralın cihazı baş nazirlə paylaşmaq barədə zarafat etdiyi qeyd olunub.