Bahar gedib, payız gəlib, qış qalıb...
Azərbaycanın xalq şairi Sabir Rüstəmxanlı ömrünün 81- ci ilini yaşayan və ağır xəstəlikdən əziyyət çəkən Musa Yaqubu ziyarət edib. “Qafqazinfo” xəbər verir ki, bu barədə S. Rüstəmxanlının qardaşı sosial şəbəkədə paylaşım edib.
Fotodan da göründüyü kimi, artıq M. Yaqubun səhhəti daha da pisləşib. O, böyük ziyalıya Allahda şəfa diləyib və tezliklə sağalmasını arzulayıb.
“Qafqazinfo” bu məqamda Musa Yaqubun “Bu dünyanın qara daşı göyərməz” şeirini təqdim edir:
Leyləklərin çöp yuvası boş qalıb,
Bahar gedib, payız gəlib, qış qalıb.
Göy çəməndə ocaq yanıb, daş qalıb,
Bu dünyanın qara daşı göyərməz.
Nə o ocaq közərəsi, sönəsi,
Nə o günlər bir də geri dönəsi…
Qəm eləmə, könlümün bir dənəsi,
Bu dünyanın qara daşı göyərməz.
O gülyanaq bənddir bir xoş baxışa,
Körpə budaq əl açıbdır yağışa.
Min baharın hərarəti yığışa,
Bu dünyanın qara daşı göyərməz.
Ot göyərdib o cığırım, o izim,
Tufanlanıb çalxalanmaz dənizim.
Daha məndən sevgi umma, əzizim,
Bu dünyanın qara daşı göyərməz.
Araz boyu çox mənalar sezmişəm,
Elə bilmə əllərimi üzmüşəm.
Ürəyimə daş bağlayıb dözmüşəm,
Bu dünyanın qara daşı göyərməz.
Son Xəbərlər
- 1
- 2
- 3
- 4
- 5
- 6
