Rioda keçirilən Yay Olimpiya Oyunları davam edir. “Qafqazinfo” xəbər verir ki, bu gün də Azərbaycan idmançıları yarışlara qatılacaq.
66 kq çəki dərəcəsində yunan-Roma güləşçimiz əsas medal ümidlərimizdən biri Rəsul Çunayev mübarizəyə start verəcək.
1/16 final mərhələsindən mübarizəyə qoşulacaq idmançımızın rəqibi kubalı Migel Palasio Martinez olacaq. Qarşılaşma Bakı vaxtilə saat 17:00-da keçiriləcək.
***
Rəsul Çunayev ilk görüşünə çıxıb.
İlk hissədə Çunayev rəqibinə 2 xal qazanmaq imkanı versə də, ikinci hissədə 4 xallıq fəndlə önə keçib. Nəticədə o, 4:2 hesabı ilə qalib gələrək, 1/8 finala yüksəlib.
Onun növbəti rəqibi rusiyalı olimpiya çempionu İslambek Albiyev olacaq.
***
1/8 final döyüşü də həmyerlimizin qələbəsi ilə yekunlaşıb.
***
Güləşçimiz 1/4 finalda Tarek Aziz Benaissa (Əlcəzair) ilə üz-üzə gəlib. Qarşılaşma həmyerlimizin təmiz qələbəsi ilə yekunlaşıb. Rəsul görüşün taleyini ilk hissədə həll edib - 10:2.
***
Çunayev finala gedən yolda erməni Miqran Arutyunyana uduzub.
***
Rəsul bürünc uğrunda cənubi koreyalı Hansu Ryu ilə güləşib. Rəqibinə 8:0 hesabı ilə qalib gələn pəhləvanımız bürünc medal qazanıb.
Bu, güləş millimizin ikinci bürünc medalıdır.