Nisə Qasımova 70 yaşında!

nise-qasimova-70-yasinda
Oxunma sayı: 2407

Bu gün Xalq artisti Nisə Qasımovanın ad günüdür.

“Qafqazinfo”nun məlumatına görə, sənətkar 70 illik yubileyini qeyd edir.

N. Qasımova 1954-cü ildə Bakıda anadan olub. 8 yaşında Əfsər Cavanşirovun rəhbərlik etdiyi “Bənövşə” uşaq xorunun heyətinə qəbul edilib, 9 yaşında olarkən xorun gənc solisti olub. İfaçı 1971-ci ilin əvvəlində Müslüm Maqomayev adına Dövlət Filarmoniyası nəznindəki “Lalə qızlar ansamblı”na solist kimi dəvət edilib. Konsertlərin birində Nisə xanımın çıxışına valeh olan tanınmış bəstəkar və impressario Ələkbər Tağıyev elə həmin ərəfələrdə gənc sənətçiyə iş birliyi təklif edib. Ə. Tağıyev 1972-ci ildən Nisə Qasımova ilə yaradıcılıq birliyinə başlayır. 1972-1973 illərdə biri birinin ardınca “Ay ellər”, “Sənsən Həyatım”, “Eşqimi sönməyə qoymaram”, “Gözləyəcəyəm”, “Qəşəngdir” kimi mahnıları xalq tərəfindən sevilir və gənc müğənni tez bir zamanda möhtəşəm uğurlar əldə edir.

1979-cu ildə yeni plastinkası satışa çıxan muğəninin bu dəfə də mahnıları dillər əzbəri olur və Azərbaycanın ən böyük konsert salonlarında böyük anşlaqla konsertleri baş tutub. 1980-ci ildə isə Sovetlər Birliyinin “S pesnyami po jizni” beynəlxalq müsabiqəsində iştirak edən müğənni birinciliyi Azərbaycana qazandırıb. Bakıya dönüşündə bu möhtəşəm uğura görə Azərbaycan SSR Ali Sovetinin Fəxri Fərmanını alıb. 

1989-cu ildə isə müğənni “Əməkdar artist” fəxri adına layiq görülüb. “Yalandı dünya” albomunun möhtəşəm uğurunun ardınca “Yalvarıram”, “Qayıtdım”, “Məni satdın nəfsinə” hitlərinin dillər əzbəri olması ilə müğənni daha aktiv fəaliyyətə başlayıb.

Müxtəlif televiziya proqramlarının aparıcısı olub. 

2008-ci ildə “Xalq artisti” fəxri adına layiq görülüb. 2019-cu ildə Heydər Əliyev Sarayında “İmza:MƏN” adlı solo konserti baş tutub.

Bu gün də Azərbaycanın əfsanəvi səsi Nisə Qasımova həm sənət, həm də ictimai fəaliyyətini davam etdirməkdədir.