Toyota-nın müəyyən modelləri geri çağırıla bilər

Toyota-nın müəyyən modelləri geri çağırıla bilər
Oxunma sayı: 751

Avtomobil sənayesində baş verən hadisələrlə maraqlananlar böyük avtomobil istehsalçılarının təşkil etdiyi “geri çağırış” və ya “Xüsusi Servis Kampaniyası” adlı bir termindən, yəqin ki, xəbərdardılar. Avtobiznes sahəsində bir o qədər də fəal olmayan insanlar da bu fenomen haqqında eşitməmiş olmazlar. Beləliklə, “geri çağırış” nədir və bu prosedurun məğzi nədən ibarətdir?

Avtomobil istehsalçıları bəzən artıq istismara verilmiş və satılmış avtomobillərin detal və ya komponentlərində “zəif yerlər” aşkar edirlər — onlar avtomobillərin sıradan çıxmasına və ya nasazlığa gətirib çıxara bilər. Korporasiyalar müştərilərin qarşısında avtomobillərinin keyfiyyətinə görə məsuliyyət daşıdıqlarına görə, onlar həmin avtomobilləri profilaktik işlər məqsədilə geri çağırırlar. Beləliklə, “geri çağırış” yoxlama və müəyyən detalların dəyişdirilməsi məqsədilə qaytarma prosesini nəzərdə tutur. Bu proses həmin nəqliyyat vasitələrində mümkün ola biləcək nasazlıqların qarşısını almaq imkanı verir. Bununla yanaşı, geri çağırılan avtomobilin zəmanətdə olub-olmamasından asılı olmayaraq, həmin avtomobilin sahibi üçün təmir pulsuz həyata keçirilir.

Konstruksiyanın daima təkmilləşdirilməsi və avtomobillərin elektron sistemlərinin mürəkkəbləşməsi səbəbindən geri çağırış kampaniyalarının sayı da müvafiq olaraq artır.

Ümumilikdə, geri çağırış problemin mütləq deyil, yalnız mümkün olduğundan xəbər verir. Bizim halda, geri çağırış istehsalçı tərəfindən həyata keçirilən və istehlakçının gələcəkdə müəyyən problemlə üzləşə biləcəyinin qarşısını alan bir prosedurdur. Nəqliyyat vasitələrinin geri çağırışı müasir dünyada tam normal bir təcrübədir.

Avtomobil sənayesində baş verən hadisələri diqqətlə izləyənlər, şübhəsiz ki, ən çox danışılan geri çağırışlardan biri, yəni “Takata” təhlükəsizlik yastıqları ilə bağlı hadisədən xəbərdardılar.

“Takata” təhlükəsizlik yastıqlarında mümkün olan qüsurlarla bağlı geri çağırışların ilk kütləvi dalğası iki il bundan əvvəl baş verdi. Bu sanki bir epidemiya idi və demək olar ki, bütün nəqliyyat vasitələrinə təsir etdi. Bu faktla bağlı BMW, Toyota, Nissan, Honda, Mazda və Fiat Chrysler kimi istehsalçılar geri çağırışlar həyata keçirdi. Adı çəkilən konsernlərin sonuncusu 4 milyondan çox nəqliyyat vasitəsini geri çağırmışdır. Və bu heç də təəccüblü deyil, çünki “Takata” təhlükəsizlik yastıqlarının qlobal təchizatçısıdır — dünya üzrə beş avtomobildən biri həmin brendin təhlükəsizlik yastıqları ilə təchiz olunub.

2017-ci ilin mart ayında Toyota şirkəti ikinci geri çağırış dalğasını elan etdi. Toyota brendi Azərbaycanda böyük populyarlığa malik olduğu üçün böyük ehtimal var ki, burada istismar edilən Toyota və Lexus avtomobilləri geri çağırılan avtomobillər sırasında ola bilər. Bu səbəbdən biz zənn etdik ki, bu məlumat Toyota-nın azərbaycanlı istehlakçılarını maraqlandıra bilər. Və məhz buna görə də biz Toyota-nın rəsmi nümayəndəliyi ilə, daha dəqiq olsaq — şirkətin İctimaiyyətlə Əlaqələr üzrə menecerilə əlaqə saxladıq. O, müəyyən modellərin geri çağırış faktını təsdiq etdi. Toyota əməkdaşının şərhlərini nəzərinizə çatdırırıq:

“Biz dəqiqləşdirmək istərdik ki, geri çağırış əksər hallarda hansısa problemin mövcudluğunu nəzərdə tutmur; geri çağırışın məqsədi mümkün nasazlıqların qarşısını almaqdır. Qeyd etmək lazımdır ki, Toyota şirkətində geri çağırışların idarə olunması prosesi çox yüksək səviyyədə təşkil olunur. Distribüter rəsmi dilerlərin satdıqları geri çağırılan avtomobillər barədə təsdiqlənmiş məlumatı alan kimi, həmin məlumat ani olaraq yerli nümayəndələrə ötürülür, onlar isə öz növbələrində avtomobillərin sahibləri ilə əlaqə saxlayırlar. Bundan sonra dilerlə görüş qabağı kommunikasiya prosesi başlayır və geri çağırış proqramı çərçivəsində sonrakı xidmətlər göstərilir.

Onu da qeyd etmək vacibdir ki, müştəri ilə əlaqə saxlamaq yalnız dilerdə həmin müştərinin yenilənmiş əlaqə məlumatı olduğu halda mümkün olacaq, bu da o deməkdir ki, növbəti görüş zamanı dileri əlaqə məlumatının dəyişilməsi ehtimalından məlumatlandırmaq lazımdır.

Qeyd edək ki, Toyota avtomobillərin yoxlama prosesini asanlaşdırmaq üçün böyük addım atıb. Müştərilərə maksimal rahatlıq təqdim etmək üçün hazırlanmış xüsusi proqram onlara öz avtomobillərinin cari statusunu yoxlamaq imkanını verir. Avtomobil sahibi unikal VIN-kod vasitəsilə avtomobilinin geri çağırılan nəqliyyat vasitələrinin siyahısında olub-olmadığını müəyyən edə bilər. Bu məqsədlə müştəri şirkətin rəsmi veb-saytına daxil olub “Xüsusi Servis Kampaniyaları” bölümündə — www.toyota.az/vincheck — yuxarıda qeyd olunan kodu daxil etməlidir. Avtomobilləri ikinci əl bazarında və ya digər ölkədə almış müştərilərə gəldikdə, mövcud geri çağırış kampaniyalarının olması barədə məlumatı əldə etmək üçün VIN-kodu aşağıdakı e-poçt ünvanına göndərə bilərlər: vincheck@toyota-caucasus.com. Geri çağırılan avtomobillərin siyahısı mütəmadi olaraq yeniləndiyinə görə biz Toyota və Lexus sahiblərinə həmin siyahını vaxtaşırı yoxlamağı tövsiyə edirik.

Müəyyən avtomobilin VIN-kodu Qlobal geri çağırış sistemində aşkar olunduğu halda (alış arealından asılı olmayaraq), həmin nəqliyyat vasitəsinin sahibi zəruri işlərin aparılması üçün Toyota-nın Azərbaycandakı rəsmi dilerlərindən birinə müraciət etməlidir: Toyota Bakı Mərkəzi, Toyota Abşeron Mərkəzi və Toyota Gəncə Mərkəzi. Bir daha xatırladaq ki, “geri çağırış” işlərin pulsuz görülməsini və detalların kampaniyanın texniki sənədləşməsinə uyğun olaraq dəyişdirilməsini nəzərdə tutur”.




 

 

 

 


Daha tez məlumatlanmaq üçün yeni Facebook səhifəmizi