Bakıda bərbər və lazer ustası kimi fəaliyyət göstərən Səbuhi Bəkirzadə tibbi-kosmetoloji avadanlıqların satışı ilə məşğul olan şirkətdən şikayətçidir. 

“Qafqazinfo”ya müraciət edən S.Bəkirzadə bildirib ki, aldığı bahalı “Laserconn dual” markalı lazer cihazı nasaz çıxıb.

O, lazer cihazını ötən ilin 10 avqustunda aldığını, lakin qısa müddət sonra ortaya problem çıxdığını deyib. Şikayətçinin sözlərinə görə, nasazlıq səbəbindən müştərilərinin bədənində qızartı və səpkilər yaranıb. S.Bəkirzadə iddia edir ki, satışı həyata keçirən şirkət zəmanət müqaviləsinə əməl etməyərək aparatı geri götürmür: “Ötən ilin avqust ayında “Messa Group” şirkətindən 30 min manat dəyəri olan “Laserconn dual” markalı aparatı aldım. Pulum çatmadığı üçün 16 min manat ilkin ödəniş etdim. 13 min manatı isə lizinq şərtləri ilə ödədim və hər ay 1100 manat müqavilə bağladığım lizinq şirkətinə ödəniş edirəm. Lakin aparatı işlədiyim Müşfiq qəsəbəsindəki salona gətirdikdən qısa müddət sonra problemlər ortaya çıxdı. Aparatın keyfiyyətsiz olması səbəbindən müştərilərin bədənində qızartılar yaranır, səpkilər olur. Bu səbəbdən çoxsaylı şikayətlər gəlir və müştərilərimi itirmişəm”.

Şikayətçi bildirib ki, “Messa Group” şirkətindən aparat alarkən müqavilə imzalanıb və 2 il zəmanət müddəti təyin edilib: “Şirkətə müraciət edərək aparatın problemli olduğunu bildirmişik. 2 ay yarımdır müraciətlər edirik. Gah deyirlər müraciətinizə baxılır, gah da “ikinci əl aparat sata bilmərik” deyirlər. Və ya dəqiq cavab verməyərək bizi gözlədirlər. Şirkətin sahibi ilə görüşməyə, məsələni izah etməyə şərait yaratmırlar. Artıq müştərilərimizi də itirdiyimiz üçün aparata görə götürdüyümüz krediti ödəyə bilmirik”.

S.Bəkirzadə məsələ ilə bağlı şirkət rəhbərliyinin qərar verməsini və ya aidiyyəti qurumların bunu araşdırmasını xahiş edib.

Mövzu ilə bağlı “Messa Group” şirkəti ilə əlaqə saxladıq. Şirkətdən saytımıza bildirildi ki, hazırda məsul şəxsləri işə çıxmır: “Bununla əlaqədar növbəti günlərdə zəng etməyinizi məsləhət görürük”.

***

“Messa Group MMC” məsələ ilə bağlı açıqlama yayıb:

“Müştəri Səbuhi Bəkirzadəyə öz istəyinə əsasən qeyd olunan cihazı satmışıq. Ona cihazın istifadəsi ilə bağlı təlimlər tərəfimizdən keçirilib və sertifikat verilib. Cihazın işləməməsi, texniki problemlər, servis problemləri ilə bağlı hər hansı bir müraciət olmayıb və texniki qüsuru olmayıb. Müştəri cihazı 3-4 ay istifadə etdikdən sonra bizə cihazın “kişi pasiyentlərdə səpkilər verir” şikayəti ilə müraciət edib. Şirkətimizin rəsmi servisi cihaza baxış keçirib və texniki hər hansı bir xətanın və nasazlığın olmaması sübut olunub (müştərinin öz imzası ilə rəsmi akt mövcuddur). Bundan əlavə müştəriyə yerində əlavə təlim, izahat şirkətimizin rəsmi təlimçisi tərəfindən verilib. Cihazın effektində hər hansı qüsurun olmaması yerində sübut edilib.

Müştəri öz şəxsi problemləri səbəbindən cihazı aldığı tarixdən etibarən təxmini 5 aydır istifadə edir ve cihazı qaytarmaq istəyir, ödədiyi pulu da geri istəyir. Azərbaycan Respublikasının Qanunvericiliyinə və şirkət qaydalarına əsasən, biz 5 ay istifadə olunmuş və 1 milyon atış (müştəriyə təxmini 5-6 min AZN gəlir gətirib) istifadə olunmuş cihazı geri götürə bilmərik”.