“1992-ci ildə yaradılan Minsk qrupuna həmsədrlik edən ölkələr müəyyən müddət sonra bütün səlahiyyətləri öz əllərində cəmləşdirdilər”.

“Qafqazinfo” xəbər verir ki, bunu Prezident İlham Əliyev Azərbaycan xalqına müraciətində deyib. 

Dövlət başçısı bildirib ki, onlar bu məsələni faktiki olaraq inhisara götürdülər: 

“Faktiki olaraq Minsk qrupu iflic vəziyyətə düşdü və 3 ölkə bu məsələ ilə məşğul olmağa başladı. Amma bunun bir nəticəsi oldumu? Olmadı, bizim üçün olmadı. Ermənistan üçün oldu. Ermənistan elə bu nəticəni istəyirdi ki, daim danışıqlar getsin, daim bizim başımızı aldatsınlar. Bəs nədir Minsk qrupunun fəaliyyəti? İşğalçıya təzyiq edə bilibmi? Yox. Təzyiq etmək istəyibmi? Yox. 

Dəfələrlə mən onların qarşısında məsələ qaldırmışdım ki, məsələnin həllini görmək istəyirsizsə, Ermənistana sanksiyalar tətbiq edin. Siz BMT Təhlükəsizlik Şurasının daimi üzvlərisiz, istənilən məsələni həll edə bilərsiniz. Xüsusilə, bu ölkələrin nümayəndələri deyirlər ki, bu məsələdə onların fikirləri üst-üstə düşür. O da maraqlı bir məsələdir. Nətər olur, bütün başqa məsələlərdə, nüvə silahları ilə bağlı, Yaxın Şərqdə, Asiyada, Avropada olan vəziyyətlə bağlı bunların maraqları daban-dabana ziddir. Hansı başqa məsələdə bunların maraqları üst-üstə düşür? Heç bir məsələdə. Ancaq Dağlıq Qarabağ məsələsində. Nə üçün? Hər kəs başa düşür. Dondurulmuş vəziyyət bizdən başqa hər kəsi qane edirdi, təbii ki, bu ölkələr arasında”.

Prezident əlavə edib ki, buna görə də Minsk qrupunun fəaliyyətinə başqa qiymət vermək olmaz: 

“Elə bil ki, bizi bu vəziyyətlə barışmağa sürükləyirdilər ki, yeni reallıqlar yaranıbdır, siz də reallıqlarla hesablaşmalısınız. Biz yeni reallıq yaratmışıq, hər kəs yeni reallıqla hesablaşmalıdır! Amma biz nəyi görürük? Biz öz torpaqlarımızı işğalçılardan azad etməyə başlayanda görün nələr baş verir. Nə qədər böyük təzyiq göstərirlər Azərbaycana. Hər tərəfdən əl-ayağa düşdülər. Bəs nə oldu, 28 il süründürə-süründürə bu məsələni həll edirdiniz? Gəlib-getmək, orada görüş, burada danışıqlar. Yığılmışdıq boğaza biz bu danışıqlardan. Nə qədər düşmənlə danışıqlar aparmaq olar? Düşmən harınlaşıb. 

Deyirdilər ancaq sülh yolu ilə, bunun hərbi variantı yoxdur. Kim deyir yoxdur? Bəs indi məsələnin hərbi variantı deyilmi? Biz nə edirik? BMT Təhlükəsizlik Şurasının qətnamələrini təkbaşına icra edirik. Halbuki bu, BMT Təhlükəsizlik Şurasının vəzifəsidir. Biz yeni reallıq yaratmışıq, hesablaşın! Ancaq nə görürürk, orada görüş, burada görüş. Atəşkəs belə oldu, atəşkəsi kim pozdu”.