“Azərbaycanda tualet yaralı mövzudur” - Ömər Faiqin nəvəsi

azerbaycanda-tualet-yarali-movzudur
Oxunma sayı: 6973

Təxminən 5 il öncə Milli Turizm Təbliğatı Bürosunun mətbuat katibi, hazırda Dövlət Turizm Agentliyinin (DTA) sədrinin müşaviri Kənan Quluzadə mətbuata açıqlamasında bildirmişdi ki, Azərbaycana gələn turistlərin tualet problemi tezliklə həllini tapacaq.

O qeyd etmişdi ki, bu problemin aradan qaldırılması üçün ölkədə hər 100 km-dən bir turizm məlumat mərkəzlərinin yaradılması planlaşdırılır.

Həmçinin oxuyun: Большая игра за Кавказ - Сенсационные данные о миссии ЕС - Видео

“Qafqazinfo” “Yeni Müsavat”a istinadən xəbər verir ki, Azərbaycan milli mətbuatının böyük nümayəndəsi Ömər Faiq Nemanzadənin İngiltərənin Kembric şəhərində yaşayan nəticəsi Ülviyyə Pepinovanın bir müddət öncə ölkəmizə səfəri turistlərin tualet problemini yenidən qabardıb. Ülviyyə xanım öz narazılığını sosial şəbəkə hesabı üzərindən bildirib.

O, Qobustan muzeyinin ayaqyolusundakı natəmizlik haqda bunları qeyd edib:

“Tənqid etmədən olmaz. Azərbaycanda tualet yaralı mövzudur. Qobustan muzeyindəki tualetin istifadəçilərinin əksəriyyəti isə yerli deyil, xarici turistlərdir. Düşünürsünüz ki, gedib muzey işçilərinə şikayət etmədim? Əlbəttə ki, getdim. Bu biabırçılığı sosial şəbəkələrdə paylaşacağımı da dedim. Daha doğrusu, bunun bir hissəsini”.

Peşəkar turist bələdçisi (gid) Balaş Maqsudbəyli bildirib ki, Ülviyyə Pepinovanın qaldırdığı məsələ yeni deyil:

“5-6 il bundan öncə bu haqda mən də danışmışam, həmkarlarım da söhbət açıb. Baxmayaraq ki, bəzi muzeylər yenidən tikilib, amma orada ayaqyolu ilə bağlı xidmət zəifdir. Bu baxımdan Milli Xalça Muzeyi, Yanardağ Muzeyi fərqlənir. Turistlərlə çalışan bir şəxs kimi təəssüflə bildirirəm ki, bu sektorda tualet məsələsi qənaətbəxş deyil. İran sərhədinə qədər yolda normal bir tualetə rast gəlmək olmur.

Yadımdadır, xarici turistlərlə Astaradan qayıdarkən vəziyyət gərgin idi, normal tualet tapa bilmirdik. 3-4 il bundan əvvəl bəzi yanacaqdoldurma məntəqələrində təmiz tualetlər var idi, amma indi vəziyyət dəyişib. Şəxsi obyekt olduğuna görə birdən-birə 30 nəfərin daxil olmasına narazılıq edirlər. Məndə olan məlumata görə, son illər yolboyu müasir standartlara cavab verən tualetlər tikilir. Gürcüstan sərhədinə qədər və cənubda belə ayaqyolular tikilib. Amma hansısa səbəbdən hələ açılmayıb. Təbii ki, muzeylərin də tualetlərinə bir az əl gəzdirsələr - vaxtında silib-süpürsələr, səliqəli vəziyyətdə saxlasalar və məlzəmələri vaxtında yerləşdirsələr, qonaqlar qarşısında üzüağ olarıq. Tualet də bir mədəniyyətdir”.