“Azərbaycan Dəmir Yolları” (ADY) QSC bu gündən Bakı–Ağdam–Bakı marşrutu üzrə sərnişin daşımalarına start verib.

“Qafqazinfo” xəbər verir ki, Ağdama sərnişin qatarı artıq yola düşüb. Saat 07:10-da yola düşən müasir “Stadler” qatarı Ağdama 11:53-də çatacaq.

32 ildən sonra ilk dəfə bu gün Bakıdan Ağdama yola düşmüş sərnişin qatarında tam doluluq qeydə alınıb. Belə ki, 27 avqustda satışa çıxarılmış biletlər 3 gün ərzində satılıb.

Sərnişinlər arasında Ağdamdan olan tanınmış ictimaiyyət nümayəndələri, media mənsubları və qonaqlar da var.

***

Bu gün paytaxtdan yola düşən Bakı–Ağdam–Bakı marşrutu üzrə ilk sərnişin qatarı Ağdama çatıb.

Qatar saat 18:20-də əks istiqamətdə yola düşəcək.

Xatırladaq ki, işğal dövrünə qədər Bakıdan Ağdama kimi sərnişin daşımaları Bakı–Xankəndi–Bakı marşrutu üzrə hərəkət edən yataq tipli qatarla həyata keçirilirdi. Qatarlar Bakı–Ağdam–Bakı istiqamətində sonuncu dəfə 1993-cü ildə hərəkət edib. Həmin vaxt qatarla Ağdama kimi 371 km olan məsafə 8 saat yarıma qət edilirdi.

***

Səfərlə bağlı danışan Ağdam, Füzuli və Xocavənd rayonlarında Azərbaycan Prezidentinin xüsusi nümayəndəsi Emin Hüseynov bu günün əlamətdar olduğunu bildirib:

“Ağdam-Bakı qatarı ilk dəfə fəaliyyətə başladı. İlk qatar Bakıdan Ağdama gəldi”.

O qeyd edib ki, bu qatarın fəaliyyətə başlaması həm də Böyük Qayıdışın çox vacib simvoludur: “Bütün Qarabağda bərpa quruculuq işləri görülür. Bütün bu proseslər Ağdamda da gedir. Hətta gözlədiyimizdən daha çox bilet satışı həyata keçirilib. Biz bu qədər sərnişin gözləmirdik.

Bu Avtovağzal-Dəmiryolu vağzalı kompleksi Azərbaycanda bir ilkdir. Azərbaycanda ilk dəfədir ki, həm avtovağzal, həm də dəmiryolu vağzalı bir məkanda yerləşir. Bu da nəqliyyatın səmərəli təşkilinə şərait yaradacaq”.

Mədinə Useynova